Ońtústik Koreianyń Inchhon qalasynda qutqarýshylar qurylys alańynda bolǵan órttiń qurbandaryn izdep jatyr. Bul týraly Rionhap agenttigi habarlady.
Órt saldarynan 38 adam qaza bolyp, 10 adam túrli dárejede jaraqat alǵan. Órt sóndirýshilerdiń aitýynsha, sársenbi kúni kúndiz Seýlden ońtústik-shyǵysqa qarai 50 shaqyrym jerde ornalasqan Inchhon qalasynda salynyp jatqan tórtqabatty ǵimarat órtene bastaǵan. Jalyn bes saǵattan soń sóndirildi. Jergilikti bilik órtke qurylys jumystary kezinde ýretan jarylýy sebep bolǵan dep sanaidy.
Kóz jumǵan 38 adamnyń kóbi - qurylysshylar. Beisenbi kúni tańerteńgi jaǵdai boiynsha, jaraqat alǵan segiz adam aýyr halde jatyr, eki adam jeńil jaraqat alǵan.
Eske sala ketsek, Inchhonda álemde DRAM chiptaryn shyǵarý boiynsha ekinshi orynda turǵan SK hynix Inc. kompaniiasy, sondai-aq bólshek saýdanyń kóptegen qoimalary ornalasqan.
Izdeý-qutqarý jumystary áli júrip jatyr.
Politsiia, órt kúzeti organdary jáne Ulttyq sot-meditsinalyq qyzmeti órttiń shyǵý sebebin anyqtaý úshin birlesken tergeý bastaýdy josparlaýda.
Bilik denesi qatty kúiip, qaza bolǵan toǵyz adamnyń kim ekenin anyqtaý jumysyn bastap ketti.
Adamdardyń aty-jónin anyqtaý protsesi tolyq aiaqtalǵan soń tótenshe jaǵdai kezinde kómek kórsetetin qalalyq top órt qurbandaryn eske alý qurmetine memorialdyq eskertkish ornatpaq.
