وڭتٷستٸك كورەيانىڭ ينچحون قالاسىندا قۇتقارۋشىلار قۇرىلىس الاڭىندا بولعان ٶرتتٸڭ قۇرباندارىن ٸزدەپ جاتىر. بۇل تۋرالى ريونحاپ اگەنتتٸگٸ حابارلادى.
ٶرت سالدارىنان 38 ادام قازا بولىپ, 10 ادام تٷرلٸ دەرەجەدە جاراقات العان. ٶرت سٶندٸرۋشٸلەردٸڭ ايتۋىنشا, سەرسەنبٸ كٷنٸ كٷندٸز سەۋلدەن وڭتٷستٸك-شىعىسقا قاراي 50 شاقىرىم جەردە ورنالاسقان ينچحون قالاسىندا سالىنىپ جاتقان تٶرتقاباتتى عيمارات ٶرتەنە باستاعان. جالىن بەس ساعاتتان سوڭ سٶندٸرٸلدٸ. جەرگٸلٸكتٸ بيلٸك ٶرتكە قۇرىلىس جۇمىستارى كەزٸندە ۋرەتان جارىلۋى سەبەپ بولعان دەپ سانايدى.
كٶز جۇمعان 38 ادامنىڭ كٶبٸ - قۇرىلىسشىلار. بەيسەنبٸ كٷنٸ تاڭەرتەڭگٸ جاعداي بويىنشا, جاراقات العان سەگٸز ادام اۋىر حالدە جاتىر, ەكٸ ادام جەڭٸل جاراقات العان.
ەسكە سالا كەتسەك, ينچحوندا ەلەمدە DRAM چيپتارىن شىعارۋ بويىنشا ەكٸنشٸ ورىندا تۇرعان SK hynix Inc. كومپانيياسى, سونداي-اق بٶلشەك ساۋدانىڭ كٶپتەگەن قويمالارى ورنالاسقان.
ٸزدەۋ-قۇتقارۋ جۇمىستارى ەلٸ جٷرٸپ جاتىر.
پوليتسييا, ٶرت كٷزەتٸ ورگاندارى جەنە ۇلتتىق سوت-مەديتسينالىق قىزمەتٸ ٶرتتٸڭ شىعۋ سەبەبٸن انىقتاۋ ٷشٸن بٸرلەسكەن تەرگەۋ باستاۋدى جوسپارلاۋدا.
بيلٸك دەنەسٸ قاتتى كٷيٸپ, قازا بولعان توعىز ادامنىڭ كٸم ەكەنٸن انىقتاۋ جۇمىسىن باستاپ كەتتٸ.
ادامداردىڭ اتى-جٶنٸن انىقتاۋ پروتسەسٸ تولىق اياقتالعان سوڭ تٶتەنشە جاعداي كەزٸندە كٶمەك كٶرسەتەتٸن قالالىق توپ ٶرت قۇرباندارىن ەسكە الۋ قۇرمەتٸنە مەموريالدىق ەسكەرتكٸش ورناتپاق.
