Jeksenbi kúni Ońtústik Koreiada koronavirýstyń jańa túrin juqtyrǵan taǵy úsh oqiǵa tirkeldi, – dep habarlaidy Renhap agenttigi.
Osylaisha koronavirýstyń jańa túrin juqtyrǵandar 15-ke jetti. Aita ketý kerek, 87 adam muqiiat tekserip shyǵý úshin karantinde jatyr. Aýrýlardy baqylaý jáne aldyn alý jónindegi korei ortalyǵy 28 jastaǵy 13-shi naýqasty juma kúni Qytaidyń Ýhan qalasynan jetkizilgen 368 adamnyń biri ekenin habarlady. Alǵash kelgende er adamnan jańa koronavirýstyń eshqandai belgisi bolmaǵan jáne ony Seýlden ońtústik-batysqa qarai 90 shaqyrym jerde Asandaǵy memlekettik mekemege ornalastyrǵan. Kelesi kúni ol ózin jaisyz sezingen. Synama odan koronavirýstyń bar ekenin kórsetken. Densaýlyq saqtaý agenttiginiń habarlaýynsha, er adam dereý el astanasyndaǵy aýrýhanaǵa jetkizilip, karantinge jatqyzyldy.
«Ýhannan kelgen adamdardyń birinshi leginen bir adamnan basqasynda virýs tabylmady. Senbi kúni elge ushyp kelgen 333 koreidiń jeteýi muqiiat tekserýden ótti. Olardyń aǵzalarynan virýs tabylǵan joq. Degenmen, qalǵan 326 adamdy tekserý jalǵasýda», - dep habarlady ortalyqtan.
Koronavirýstyń jańa túrin juqtyrǵan 14-shi adam – virýs juqtyrǵan er adamnyń 40 jastaǵy áieli. Onyń aǵzasyndaǵy virýs ótken senbi kúni tabyldy.
Ortalyqtyń habarlaýynsha, on ekinshi naýqas – Japoniiada gid bolyp jumys istegen qytailyq. Ol bailanysty bolǵan kúnshyǵys eliniń azamattaryna virýs diagnozy qoiylǵan. 19 qańtarda gid Ońtústik Koreiaǵa kelgen, biraq kelgennen keiin koronavirýs belgisi baiqalmaǵandyqtan, ol emin-erkin júrgen. Koreilik ortalyq elde júrgende onymen bailanysta bolǵan 138 adamnyń anyqtalǵanyn habarlady. Qazirgi ýaqytta ortalyq qyzmetkerleri atalǵan gidten koronavirýs juqtyrýy múmkin adamdardy izdeýde. Al on besinshi aýrý juqtyrǵan naýqas 43-jasar ońtústikoreialyq virýs oshaǵy Ýhanda bolǵan. Er adam elge 20 qańtarda oralǵan. Bilik onyń baqylaýda ekenin málimdedi.
Koreialyq aýrýlardy baqylaý jáne aldyn alý ortalyqtary naýqas adamdardyń qai jerlerge barǵanyn anyqtap jatyr. Sol arqyly infektsiia juqtyrýy múmkin adamdardyń sanyn anqytaý kózdelip otyr. Úkimettiń qolǵa alǵan aýqymdy sharalaryna toqtala ketetin bolsaq, Ýhan qalasy men Hýbei provintsiiasynan adamdardyń kelýine shekteý jariialandy, el azamattarynyń densaýlyǵy úshin qaýip tóndirýi múmkin kez kelgen adam aýrýdyń beti qaitqansha oqshaýlaityn qatań shara qoldanylatyny málim etildi.
