Ońtústik Koreia tarapynan Qazaqstan azamattarynyń elge kelýine shekteý qoiatyndyǵy týraly resmi habar kelgen joq. Bul týraly QR Syrtqy ister ministrliginiń resmi ókili Aibek Smadiiarov aitty, dep habarlaidy "Ult aqparat".
«Ózderińizdei biz de buqaralyq aqparat quraldarynan «Koreia tarapy Qazaqstan azamattarynyń elge kelýine shekteý qoiady» degen aqparatty kórdik. Osyǵan orai mundai aqparattyń bizge resmi kelmegendigin habarlaimyz. Resmi habar kelip tússe, onda biz ony jariialaimyz», - dedi Aibek Smadiiarov.
Onyń dereginshe, 2019 jyldyń 1 qyrkúiegindegi korei tarapynyń bergen derekterine sáikes, qazirgi ýaqytta Ońtústik Koreianyń aýmaǵynda 10 785 Qazaqstan azamaty júr.
«Forým bastalar aldynda bizdiń ministrimiz koreialyq áriptesimen ekijaqty kezdesý ótkizdi. Onyń barysynda koreialyq tarappen eki eldiń arasyndaǵy kóshi-qon saiasaty máselelerin qarastyrdy. Biraq, mán-jaiyn sizderge jariia ete almaimyn», - dedi resmi ókil.
Aita keteiik, QR Syrtqy ister ministrliginde «Ortalyq Aziia - Ońtústik Koreia» 12-forýmy óz jumysyn bastady. Sharaǵa Qazaqstan, Ózbekstan, Qyrǵyzstan Syrtqy ister ministrleri qatysýda. Al Túrikmenstan tarapynan sol eldiń Qazaqstandaǵy Elshisi qatysyp otyr.
