Koreia Respýblikasynyń Qazaqstandaǵy Elshiligi otandyq meditsina mamandaryna gýmanitarlyq kómek kórsetti, dep habarlaidy QazAqparat.
«Aldymen aitýly is-sharaǵa ýaqyt bólip kelgenderińiz úshin barshańyzǵa alǵys bildiremin. Búgingi gýmanitarlyq kómek «Qaiyrymdy ister marafony» aiasynda koronavirýs indetimen kúreste aldyńǵy shepte júrgen meditsina mamandaryna arnalady. Dárigerlerdiń COVID-19 indetimen kúrestegi eńbegi zor jáne biz usynǵan kómek óz járdemin tigizedi dep oilaimyz. Virýspen kúres maqsatynda Koreia Respýblikasy Qazaqstan Respýblikasymen jan-jaqty yntymaqtastyqta, birlesip jumys isteidi. Sonyń dáleli ótken jyly Korei Respýblikasy Qazaqstan jáne Dúniejúzilik densaýlyq saqtaý uiymy bolyp, birlesip, úshjaqty kelisim aiasynda bizdiń el Qazaqstanǵa 800 myń dollar kóleminde qarjy bóldi. Odan bólek, balalar men qarttar úii, osal topqa jatatyn jandarǵa jáne bilim berý mekemelerine gýmanitarlyq kómek joldandy», - dedi Koreia Respýblikasynyń Qazaqstandaǵy Elshisi Ký Hong-sok.
Sondai-aq, elshi myrza eki el arasyndaǵy dostyq yntymaqtastyq odan ári óz jalǵasyn tabatynyn alǵa tartty.
«Búgin Koreia Respýblikasynyń Qazaqstandaǵy Elshiligi elimizdiń 4 aimaǵyndaǵy 8 meditsinalyq mekemege gýmanitarlyq kómek kórsetip otyr. Onyń qatarynda Nur-Sultan qalasy, Qyzylorda, Qostanai jáne Pavlodar oblysy bar. Gýmanitarlyq kómek meditsina qyzmetkerlerine arnalǵan. Atap aitqanda, qorǵanysh kostiými (kombinezon), antiseptik, meditsinalyq qolǵap jáne taǵy basqa virýstan qorǵaityn quraldar bar», - dedi QR Parlamenti Májilisiniń depýtaty, Ulttyq volonterler jelisiniń tóraǵasy Vera Kim.
Onyń aitýynsha, Ońtústik Koreia Respýblikasy tarapynan gýmanitarlyq kómek buǵan deiin de júzege asyryldy jáne aldaǵy ýaqytta ta odan ári jalǵasyn tabatyn bolady.
