Jýyrda on adamdy órtten qutqarǵan qazaq jigitine Ońtústik Koreia biligi arnaiy viza beretin boldy, dep habarlaidy "Ult aqparat".
«Búgin Koreianyń Ádilet ministrliginiń ókilderi jýyrda órt shyqqan turǵyn úiden on shaqty adamdy qutqaryp alǵan bizdiń Álimen kezdesti. Kezdesý barysynda otandasymyzdyń sol elde turý mártebesine ózgeris engizý protsedýrasy talqylandy. Áli tiisti ótinimdi bergen edi. Koreia tarapy onyń qujattarynyń bárin qarap, Álige arnaiy viza berý týraly sheshim qabyldady», - dep habarlaidy QR SIM resmi ókili Aibek Smadiiarov.
QR Syrtqy ister ministrligi resmi ókiliniń habarlaýynsha, Álige aldaǵy ýaqytta turaqty turatyndai mártebe berý máselesi de talqylanady. Ońtústik Koreia biligi bergen mundai artyqshylyqty Áli paidalana ma, joq pa – ózi sheshedi.
«Sonymen qatar koreilik LG Welfare Foundation qory Álidi arnaiy LG Personnel Award syilyǵymen marapattaýdy usyndy. Ol syilyq basqa adamdardy qutqaryp qalǵan batyl jandarǵa beriledi», - deidi Aibek Smadiiarov.
Aita keteiik, Ońtústik Koreiada Qazaqstan azamaty órt kezinde 10 adamdy qutqaryp, memlekettik marapatqa usynylǵanyn buǵan deiin habarlaǵan edik. Túrkistandyq Áli otbasymen birge 2017 jyly Ian Ian shipajaily qalashyǵyna jumys izdep kelgen.
Oqiǵa ótken aida bolǵan. Ol 23 naýryz túngi saǵat 11-de tútin iisin sezgen. Sóitse, kórshi páterlerdiń birinde órt shyqqan.
Órt bolǵan bólme ishinde áiel qalyp qalǵan. Áli ol bólmeniń esigin asha almai, páterge gaz qubyrymen jáne telekabelmen órmelep shyǵyp, ishine kirgen. Ókinishke qarai, órt shyqqan páterde bolǵan áiel keiinnen aýrýhanada kóz jumǵan. Otandasymyz ózge kórshilerin oiatyp úlgergen. Sonyń arqasynda olar der kezinde syrtqa shyǵyp, aman qalǵan.
Jerlesimiz erligi jaily da, órt kezinde denesin kúiik shalǵany týraly da týystaryna tis jarmapty. Meditsinalyq kómekten de bas tartqan. Alaida kórshileri boi bermei, ony aýrýhanaǵa jetkizip, emge ketetin shyǵyndy ózderi tólegen.
