Beisenbi kúni politsiia Ońtústik Koreianyń astanasy Seýl meriniń denesin tapty. Aldyn ala málimet boiynsha, ol óz-ózine qol salǵan, dep habarlaidy VVS agenttigi.
64 jastaǵy Pak Von Sýnnyń joǵalyp ketkeni týraly beisenbi kúni keshke merdiń qyzy habarlaǵan.
Onyń aitýynsha, ákesi úiinen shyǵyp ketip, oralmaǵan. Ol qyzyna hat ta qaldyryp ketken. Ony kórgennen keiin birden politsiia shaqyrǵan.
Qala ákimshiliginen Associated Press agenttigine habarlaǵandai, Pak Von Sýn beisenbi kúni jumysqa kelmegen. Osyǵan bailanysty onyń qatysýy tiis bolǵan barlyq jinalystar men is-sharalar keiinge qaldyrylǵan.
Baqylaý kamerasyna merdiń saǵat 10:53-te Sonbýk-gý aýdanyndaǵy ormanǵa ketip bara jatqany túsip qalǵan. Sol jerden sońǵy ret uialy telefonynyń signaly tirkelgen.
Merdi izdeý jumystaryna 600-ge jýyq politsei men órt sóndirýshi qatysty. Operatsiiaǵa drondar men iz kesýshi itter de tartyldy.
Eske sala keteiik, Pak Von Sýn 2011 jyly Seýl basshysy bolyp sailandy. Ótken jyldyń shildesinde ol úshinshi ret mer bolyp sailandy jáne zańǵa sáikes, bul atalǵan laýazymdaǵy sońǵy merzimi edi.
Bilimi boiynsha - zańger. 1982 jyldan bastap advokattyq qyzmetpen ainalysty jáne adam quqyqtary boiynsha mamandandy.
1970 jyldardyń sońynda ol Pak Chýn Hi diktatýrasyna qarsy stýdenttik narazylyqtarǵa qatysqany úshin Seýl ulttyq ýniversitetinen shyǵaryldy. Oqýdan shyqqannan keiin ol birneshe ai túrmede bolǵan.
1993 jyly Garvard ýniversitetiniń zań fakýltetinde ǵylymi qyzmetker bolyp jumys istedi.
Seýl meri qyzmetinde bolǵan kezde Pak Von Sýn qalany kórkeitýmen belsendi túrde ainalysqan.
2013 jyly ol Seýl metrosynda jáne qala mańyndaǵy poiyzdarda jol júrý aqysyn kóterýdi toqtatqan bolatyn.
