Ońtústik halqyn soltústikke qonystandyrý baǵdarlamasyna 2017 jyly 85 mlrd. teńge bólingen. Bul týraly búgin Astanada «Korporativtik sektorda áielderdiń múmkindigin keńeitý» atty halyqaralyq forýmda QR Eńbek jáne halyqty áleýmettik qorǵaý ministri Tamara Dúisenova málim etti.
«Qazirgi ýaqytta ońtústik óńirlerden soltústikke qonystaný boiynsha baǵdarlama qolǵa alyndy. Alǵashqy jumystar bastalyp ta ketti. Eń birinshiden, Bilim jáne ǵylym ministrliginiń «Serpe» baǵdarlamasy aiasynda soltústik oblystarǵa stýdentter kelýde. Bizdiń baǵdarlama boiynsha da bul jumys jalǵasyn tabady. Biyldyń ózinde bul baǵdarlamaǵa respýblikalyq biýdjetten 45 mlrd teńge, jergilikti biýdjetterden - 40 mlrd. teńge qarastyrylǵan. Iaǵni, 85 mlrd. teńge osy baǵdarlamany júzege asyrýǵa bólinýde», - dedi ministr.
Aita keteiik, bunyń aldynda habarlanǵanyndai, ońtústik óńirlerden soltústik oblystarǵa kóshýge nietti adamdardy yntalandyrýdyń jańa baǵyttary engizildi. Birinshiden, qonys aýdarǵandardyń shyǵyndary 35 AEK kóleminde óteletin bolady, iaǵni otbasynyń árbir múshesine 79 myń teńge somasynda beriledi. Sonymen qatar bir jyl boiy kóship barǵan otbasynyń baspanany jaldaýǵa jumsaityn shyǵyndary sýbsidiialanady.
QR Úkimeti anyqtaǵan óńirlerge erikti túrde qonys aýdarǵan tulǵalarǵa memlekettik qoldaý sharalary qarastyrylǵan. Jyl saiyn, óńirler men jumys berýshilerdiń eńbek resýrstaryna suranysyn eskere otyryp, ishki kóshi-qon kvotasy belgilenedi. Atalǵan kóshti yntalandyrý tetigi retinde, bastapqy beiimdelý jáne jol men júk tasý shyǵynyn óteý quraldarynan turatyn, qazirgi tańdaǵy áleýmettik paketti qoldaný jalǵasyn tabady. Osy jyly 2,7 myń azamattyń qonys aýdarýyna sýbsidiia tóleý maqsat etilgen.
