OQO-dan «Qasietti Qazaqstan» jobasyna 23 kieli oryn engizildi. Bul týraly oblys ákimdiginiń keńeitilgen májilisinde oblystyq mádeniet basqarmasy basshysynyń mindetin atqarýshy Asylhan Temirhan málim etti, dep habarlaidy "Ult aqparat" aimaq basshysynyń baspasóz qyzmetine silteme jasap.
Elbasynyń «Bolashaqqa baǵdar: rýhani jańǵyrý» baǵdarlamalyq maqalasyna orai óńirlik komissiia qurylyp, «Qazaqstannyń kieli jerleri», «Qazirgi zamanǵy Qazaqstandyq mádeniet jahandyq álemde» is-sharalar jospary bekitilgen bolatyn. Nátijesinde óńirlik karta jobasy daiyndalyp, «Qasietti Qazaqstan» respýblikalyq ortalyǵyna oblysymyzdan 104 nysan usynyldy.
Qazirgi tańda respýblika boiynsha 100 nysan iriktelinip alynsa, onyń ishine Ońtústik Qazaqstan oblysynan 23 nysan enip otyr. Qalǵan 81 tarihi-mádeni eskertkishter jergilikti mańyzy bar qasietti, kieli jerlerdiń tizimine engizilgen.
«Shymkent qalasyndaǵy jergilikti mańyzy bar Qaratóbe qalashyǵyna arheologiialyq zertteý jumystaryn júrgizý úshin 31 mln. 436 myń teńge, Qaratóbe qorymyna arheologiialyq qazba jumystaryn júrgizý úshin 40 mln. teńge, Oba patshalyq qorymyna arheologiialyq qazba jumystaryn júrgizý úshin 24 mln. teńge, Qazyǵurt taýyn tarihi-mádeni ortalyqqa ainaldyrý úshin 1 mlrd. 513 mln.teńge, Ordabasy taýyna 1 mlrd. 200 mln. teńge qarjy qarastyrý josparlanyp otyr», - dedi oblystyq mádeniet basqarmasy basshysynyń mindetin atqarýshy Asylhan Temirhan.
