Túrkistan oblysy men Shymkent qalasynda ósirilgen oramjapyraqty el óńirleri satyp alatyn boldy, dep habarlaidy "Ult aqparat" QR Aýyl sharýashylyǵy ministrligine silteme jasap.
Túrkistan oblysynyń agrariileri biylǵy jyly 8 myń gektar alqapqa erte shyǵatyn oramjapyraqty egip, sáýir jáne mamyr ailarynda 300 myń tonnaǵa jýyq ónim alýdy josparlap otyr. Sharýalar Tótenshe jaǵdai kezinde ósirilgen ónimdi saqtaý jáne satý barysynda qiyndyqqa tap bolamyz dep alańdaýshylyq bildirgen bolatyn.
«QR AShM fermerlerge kómek retinde dúisenbi kúni oblys ákimdikterimen keńes ótkizip, oblystardy ózara azyq-túlik qory týraly aqparatpen almasyp, tapshylyq baiqalǵan aimaqtarǵa ónimniń mol qory bar óńirlerden taýar almasýǵa shaqyrdy.
Nátijesinde respýblikanyń barlyq óńiriniń jergilikti atqarýshy organdary jaqyn arada Qazaqstannyń ońtústiginen 50 myń tonna erte shyǵatyn oramjapyraqty satyp alýǵa daiyn ekendikterin habarlady.
Sonymen qatar, Aýyl sharýashylyǵy ministrligi ónimdi eksporttaý úshin qajetti fitosanitariialyq sertifikattardy jedel túrde berýde. Endi fermerler qalǵan 250 myń tonna ónimdi Resei Federatsiiasyna esh kedergisiz sata alady», - dedi ministrlikten.
Málim etilgendei, búgingi tańda Shymkent jáne Túrkistan oblystary boiynsha 14 aýyl sharýashylyǵy taýaryn óndirýshi 4 myń tonnaǵa jýyq oramjapyraqty eksporttaýǵa 204 fitosanitariialyq sertifikat aldy.
«Tez buzylatyn ónimderdi kedergisiz tasymaldaý úshin fermerlerdiń avtokólikterine «#BizBirgemiz Túrkistan oblysynyń azyq-túlik ónimderi» degen jazbamen logotip jabystyrylady. Mundai japsyrmalar fitosanitariialyq jáne karantindik sertifikattarmen birge beriletin bolady», - dedi AShM-nan.
Eske salaiyq, otandyq agrariiler erte pisetin oramjapyraqty eksportqa shyǵara almai otyrǵanyna shaǵymdanǵan bolatyn. Keiin QR AShM oramjapyraqty alys jáne jaqyn shet elderge eksporttaýdy toqtatýdy josparlamaǵanyn jáne tyiym salmaǵanyn málim etti. Sondai-aq oramjapyraqty Eýraziialyq ekonomikalyq odaq elderine jetkizýge sertifikattar shtattyq rejimde berilip jatqanyn aitty.
