OnlineMektep bilim platformasy men ZOOM júiesiniń integratsiiasy jasyryn kiber-buzaqylardyń shabýyldarynan qorǵanýǵa jáne portal qoldanýshylarynyń tanymal halyqaralyq video-konferentsiia qyzmetin tegin paidalanýyna múmkindik beredi. Bul týraly karantin jaǵdaiynda elimizdegi mektepterde qashyqtan oqytýdy uiymdastyrý máseleleri jóninde Ortalyq kommýnikatsiialar qyzmetinde ótken baspasóz-konferentsiiasynda aityldy, dep habarlaidy QazAqparat.
Bárimizge belgili, kóktemde COVID-19 pandemiiasynyń taralýyna bailanysty qazaqstandyq mektepter jappai qashyqtan oqytý júiesine kóshti. Muǵalimder men oqýshylar oqý jylynyń IV toqsanyn qashyqtan oqyp, kópshiligi jańa oqý jylyn da osy formatta jalǵastyryp jatyr.
Biraq eriksiz mindettelgen qashyqtan oqytý formaty týraly negizsiz pikirler qalyptasyp, túrli qiyndyqtar týyndady. Qashyqtan oqytý júiesiniń jumysy qalai júredi jáne ony kimder uiymdastyrady? Kontent pen oqytý ádistemesiniń qandai túrleri qoldanylady? Kiber-buzaqylardyń shabýyldarynan qorǵanýdyń joldary qandai? Kópshiliktiń kókeiinde osyndai ózekti suraqtar týyndady.
Qashyqtan oqytýdy uiymdastyrý jáne onyń ádistemelik ári tehnikalyq erekshelikteri tóńireginde osy jáne ózge de suraqtarǵa qazaqstandyq pedagogtar men oqýshylar arasynda keń qoldanysqa ie OnlineMektep bilim platformasynyń mamandary jaýap berdi. Brifingke túrli platforma men jańa tehnologiialyq quraldardy belsendi paidalanyp júrgen elorda men ózge aimaqtardaǵy mektep muǵalimderi qatysty.
Baspasóz jiynyna qatysýshylar OnlineMektep platformasynda ár synypqa jeke sabaq kestesin qurý, arnaiy daiyndalǵan kontent kómegimen oqytýdyń tiimdi joldaryn uiymdastyrý, beine-sabaqtar ótkizý, oǵan qosa, úi tapsyrmasyn berý jáne ony tekserý, muǵalim men oqýshy bailanysyn qamtamasyz etýge qatysty aqparat berip, portal jumysymen tanystyrdy.
Jiyn barysynda joba mamandary OnlineMektep portaly men álemde videokonferentsiia qyzmetin uiymdastyrý boiynsha óte tanymal ZOOM platformasynyń integratsiiasy jasalyp jatqanyn málimdedi. Mundai integratsiia qazaqstandyq muǵalimder men oqýshylardyń ZOOM múmkindikterin tegin paidalanyp, sondai-aq, kiber-buzaqylardyń shabýyldarynan saqtanýyn qamtamasyz etedi.
Bul áleýmettik joba bolǵandyqtan mamandar platforma qyzmetine (jumysyna) qyzyǵýshylyq tanytqan ár adamnyń suraǵyna jaýap berip, pikirin tyńdaýǵa daiyn ekenderin jetkizdi.
«Biyl elimizdegi 3,5 myń mektep OnlineMektep negizinde oqytýǵa kóshti. 1 qyrkúiekten bastap kúndelikti 1,5 million oqýshy osy platforma arqyly bilim alýda. Saitqa kúndelikti millionnan asa jeke qoldanýshy kiredi, sait betteriniń kórilimi shamamen 30 millionǵa jýyq. Platforma Bilim Media Group kompaniiasy men «Nazarbaev ziiatkerlik mektepteri» AQ seriktestigi negizinde jasalǵan. Sabaq materialdaryn daiyndaý jáne portal qyzmetin jaqsartý jumystaryna kompaniia qyzmetkerleri men NZM úzdik muǵalimderi, jalpy sany 800-den asa maman atsalysýda. Qazir platformaǵa oqý jylynyń I toqsanyndaǵy 42 pán boiynsha 2 tilde 5 700 sabaq pen 140 myń jattyǵý júktelgen. Oqý jyly bastalǵaly beri muǵalimder portalda 3 millionnan asa onlain-sabaq ótkizdi, sait betteriniń qaralymy 160 millionǵa jetip, 500 millionǵa jýyq jattyǵý (tapsyrma) oryndalǵan. Ár sekýnd saiyn 70 myńnan 80 myńǵa deiin jeke qoldanýshy platforma qyzmetin bir mezette paidalanady. Portal kontentin ázirleýde oqytýdy jeke tulǵaǵa beiimdeý jáne elimizde ozyq tehnologiialardy qoldaný erekshelikteri eskerildi. Platforma qoldanýshylary virtýal synyptar men jeke toptardy, arnaiy sabaq kestelerin, synyppen nemese árbir oqýshymen jeke sóilesý chatyn quryp, video-konferentsiia rejiminde sabaq ótkizedi. Oqytýshy oqýshyǵa úi tapsyrmasyn beredi, ony tekserip ári baǵalai alady. Sondai-aq, muǵalim qalaýy boiynsha arnaiy konstrýktor arqyly jeke sabaǵyn daiyndai alady», - dedi Bilim Media Group direktory, OnlineMektep jobasynyń jetekshisi Sanjar Kenjehanuly.
Qazir OnlineMektep.org komandasy oqý jylynyń II toqsanyna arnalǵan kontentti daiyndaýmen ainalysyp jatyr. Ol kúntizbelik-taqyryptyq josparǵa sáikes, shamamen 6 myńdai sabaqtan jáne 150 myńnan asa jattyǵýdan turady.
