Biyl 1-18 sáýir aralyǵynda onlain-rejimde «Qazaqy terminderdi halyq jasaidy» atty respýblikalyq baiqaý ótedi, dep habarlaidy "Ult aqparat".
Atalǵan sharany QR Mádeniet jáne sport ministrligi Til saiasaty komitetiniń tapsyrmasymen «Til-Qazyna» ulttyq ǵylymi-praktikalyq ortalyǵy uiymdastyryp otyr.
«Baiqaýdyń maqsaty – ulttyq terminjasamnyń ózekti máselesin tiimdi jolmen sheshý, sátti termin usynýshy til janashyrlaryn anyqtaý jáne qoldaý», - delingen baspasóz habarlamasynda.
Respýblikalyq baiqaý úsh kezeńnen turady. Birinshi kezeńde qatysýshylar «Ózin-ózi tanystyrý paraǵyn» 1-5 sáýir aralyǵynda termincom2020@gmail.com elektrondy adresine joldaidy. Sondai-aq baiqaýǵa qatysýshylar «Termincom.kz» saityndaǵy elektrondy alańǵa tirkelip, 5-10 terminge balama usynýy shart.
Ekinshi kezeń 7-12 sáýir aralyǵynda ótedi. Munda birinshi kezeńnen ótken baiqaý qatysýshylaryna turmysta jii qoldanylatyn 10 shettildik terminniń qazaq tilindegi sátti aýdarmasyn jasaý tapsyrylady. Tapsyrma https://termincom.kz/alan7 sáýir kúni jariialanady. Bul rette baǵalaý kópshilik daýysy arqyly jáne qazylar alqasynyń pikirimen sheshiledi.
Úshinshi kezeń 13-18 sáýir aralyǵynda ótedi. Sońǵy ainalymǵa ekinshi kezeńnen iriktelgen azamattar qatysady. Olar belgilengen ýaqyt aralyǵynda mátin ishindegi salalyq terminderdiń qazaqy balamasyn jasaýy tiis.
«Baiqaýǵa 18 jastan asqan azamattar qatysa alady. Baiqaý qorytyndysy 20 sáýirde https://tilalemi.kz/ saitynda jariialanady. Baiqaý jeńimpazdary qazylar alqasynyń sheshimine sáikes elektrondyq úlgidegi diplom, alǵyshatpen marapattalady», - delingen habarlamada.
