Elimizde bir jylda onkologiiaǵa shaldyqqan qazaqstandyqtardyń sany 41 myńǵa ósken. Bul týraly Qazaq onkologiia jáne radiologiia ǵylymi-zertteý institýtynyń basqarma tóraiymy, onkolog Diliara Qaidarova aitty, - dep habarlaidy "Ult aqparat" Massaget.kz tilshisine silteme jasap.
Densaýlyq saqtaý birinshi vitse-ministr Timýr Sultanǵazievtyń aitýynsha, Qazaqstanda onkologiia boiynsha 222 myń adam esepte tur.
"Byltyrmen salystyrǵanda ósim – 7,1 paiyz. Erkekterge qaraǵanda (44 paiyz) áielder jii aýyrady, iaǵni 55 paiyzy. Alaida er adamdar áielderge qaraǵanda jii kóz jumady. Aýrýǵa shaldyqqan naýqastardyń 55,6 paiyzy - eńbekke qabiletti adamdar", - dedi ministrdiń orynbasary.
Onkologiialyq aýrýlar kórsetkishi boiynsha birinshi orynda sút bezi obyry tur. Odan keiin ókpe obyry, kolorektaldy obyr, asqazan obyry jáne jatyr moiny obyryn kórýge bolady.
"Ólim-jitim kórsetkishi boiynsha birinshi oryndy ókpe obyry, odan ári asqazan obyry, kolorektaldy obyr jáne sút bezi obyry tur", - dedi Timýr Sultanǵaziev.
Sondai-aq, Qazaq onkologiia jáne radiologiia ǵylymi-zertteý institýtynyń basqarma tóraiymy Diliara Qaidarova qazaqstandyqtardan qaterli isik jii anyqtala bastaǵanyn rastady.
"Qazaqstanda onkologiiaǵa shaldyqqandar sany óskeni baiqalady. Mysaly, 2023 jyly 41 myńnan asa jańa derek tirkeldi. Árine, koronavirýstan keiin tek Qazaqstanda emes, álemde onkologiiaǵa shaldyqqan naýqastar sany kúrt óskeni baiqalyp otyr.
Dúniejúzilik kongreste barlyq onkolog osy máseleni kóterdi. 5 jylda Qazaqstanda aýrýdy nóldik jáne alǵashqy kezeńde anyqtaý 5,5 paiyzǵa ósip, 35 paiyz boldy. 5 jylda 218 myń adamnyń ómir súrý jasy 55 paiyzǵa ósti. Olar (onkologiia boiynsha) 5 jyldan asa esepte turǵan", - dedi dáriger.
