Óńirlik mádeniet uiymdarynyń qyzmetin úilestirý maqsatynda óńirlik kórkemdik keńester qurylady. Bul týraly Májilistiń jalpy otyrysynda QR Mádeniet jáne sport ministri Aqtoty Raiymqulova aitty, dep habarlaidy QazAqparat.
«Qoldanystaǵy «Mádeniet týraly» Zańǵa engizilgen normalarǵa sáikes Ministrlik janyndaǵy memlekettik mádeniet uiymdarynyń qyzmetin úilestirý maqsatynda mádeniet salasyndaǵy qyzmettiń barlyq baǵyttary boiynsha respýblikalyq kórkemdik keńester jumys isteitindigi ózderińizge belgili. Kórkemdik keńesterdiń jumysy óz jemisin berýde, teatrlardyń repertýary jaqsaryp, kinojobalardyń sapasy artty, ádebiet pen óner shyǵarmalarynyń da deńgeii artyp otyr. Turaqty negizde salanyń daýly máseleleri talqylaýǵa shyǵarylyp, óz sheshimin tabýda», - dedi ministr «Qazaqstan Respýblikasynyń keibir zańnamalyq aktilerine mádeniet máseleleri boiynsha ózgerister men tolyqtyrýlar engizý týraly» zań jobasyn tanystyrý barysynda.
Sonymen qatar ol respýblikalyq kórkemdik keńes aiasynda barlyq salalardyń kóptegen problemalyq máselelerin qamtýdyń múmkin emestigin tájiribe kórsetip otyrǵandyǵyn jasyrmady.
«Osyǵan orai, zań jobasynyń negizgi mindeti óńirlik mádeniet uiymdarynyń qyzmetin úilestirý maqsatynda usynystar ázirleý ispetti óńirlik kórkemdik keńester qurýdy kózdep otyr», - dedi Aqtoty Raiymqulova.
