Búgin Májilistiń jalpy otyrysynda QR Aýyl sharýashylyǵy ministri Erbol Qarashókeev kóktemgi dala jumystaryna daiyndyq barysyn baiandady, dep habarlaidy QazAqparat.
«Qazirgi álemdik azyq-túlik naryqtarynda baǵa qubylmaly bolyp turǵan shaqta Úkimet agroónerkásiptik keshendi damytý jónindegi daǵdarysqa qarsy birqatar júieli jáne jedel sharalardy qabyldady. Búgingi kúni basym mindetterdiń biri - egis naýqanyn ýaqtyly jáne sapaly júrgizý. Memleket basshysynyń tapsyrmasy boiynsha Aýyl sharýashylyǵy ministrligi óńirlermen birlesip aýyl sharýashylyǵy tehnikasynyń, tuqym men tyńaitqyshtardyń daiyndyǵyn qaita tekserýdi aiaqtady. Qazirgi tańda tehnika daiyndyǵy 98 paiyzdy qurasa, kóktemgi dala jumystary jappai júrgizile bastaǵan ýaqytta 100 paiyzǵa jetedi», - dedi E. Qarashókeev.
Onyń aitýynsha, óńirlerge arzandatylǵan dizel otyny jóneltile bastady. Jalpy, kóktemgi dala jumystaryn júrgizýge naryqtyq qunynan 12-15%-ǵa tómen baǵamen 400,2 myń tonna bólindi, bul 2021 jylmen salystyrǵanda 20 myń tonnaǵa artyq.
«Otandyq taýar óndirýshiler tuqym materialymen qamtamasyz etildi. 2,3 mln tonna tuqym nemese jospardyń 100 paiyzy qamtyldy. Suryp jańartý maqsatynda Resei Federatsiiasynan tuqym materialyn jetkizý máselesi pysyqtaldy, kelissózder júrgizilip, tuqymdardy shyǵarýǵa salynǵan shekteýler alynyp tastaldy. Mineraldy tyńaitqyshtarǵa kelsek, Úkimet qoldaýynyń arqasynda diqandardyń qajettilikterin qanaǵattandyrý maqsatynda otandyq mineraldy tyńaitqyshtardy óndirýshilermen ýaǵdalastyqqa qol jetkizildi. Bul rette ammiak selitrasynyń baǵasy 200 myń teńgeden 160 myń teńgege deiin tómendetildi», - dedi ministr.
