Foto: Tengrinews.kz
Óńirlerde Nursultan Nazarbaevtyń aty berilgen úlken dańǵyldardyń ataýyn ózgertý máselesin jergilikti deńgeide sheshý kerek. Bul týraly Májilis depýtaty Erlan Sairov aitty, dep habarlaidy QazAqparat.
«Biz óńirlerge barǵanda, turǵyndar bul baǵytta másele kóterip jatady. Sebebi, ár oblysta Nursultan Nazarbaevtyń aty berilgen úlken dańǵyldar bar. Meniń oiymsha, bul máseleni jergilikti deńgeide sheshý kerek. Kósheniń atyn aýystyrý úshin máslihat sheshim qabyldaýy tiis. Jalpy, turǵyndar bul máselege qatysty ózderiniń usynystaryn aityp jatyr», - dedi Sairov Parlament palatalarynyń birlesken otyrysynan keiin tilshiler suraǵyna jaýap bere otyryp.
Osy oraida ol Parlamenttiń Elbasy týraly qujattyń kúshin joiýǵa baǵyttalǵan Konstitýtsiialyq zańdy qabyldaýy qoǵam talaby boiynsha iske asyrylǵanyn aitty.
Aita keteiik, Parlament palatalarynyń birlesken otyrysynda «QR Tuńǵysh Prezidenti – Elbasy týraly» Konstitýtsiialyq zańnyń kúshi joiyldy dep taný týraly» Konstitýtsiialyq zań qabyldandy.
Atalǵan zań jobasy jalpyulttyq referendým nátijesinde Qazaqstan Konstitýtsiiasyna engizilgen ózgeristerdi iske asyrý maqsatynda ázirlendi.
Sairovtyń sózine qaraǵanda, eks-prezident Nursultan Nazarbaevta burynǵy basymdyqtary bolmaidy.
