QR Aqparat jáne qoǵamdyq damý ministri Dáýren Abaev "Ashyq dialog" baǵdarlamasynda óńirlerdegi kóshe ataýlarynyń ózgerýi týraly pikir bildirdi, dep habarlaidy QazAqparat tilshisi.
"Óńirlerdiń kópshiligi ortalyq kóshelerine QR Tuńǵysh Prezidentiniń atyn berdi. Biraq búgin Respýblikalyq onomastikalyq komissiiasynyń otyrysy ótti. Onda Atyraý, Aqtóbe, Qostanai, Taraz qalalary boiynsha ózge kósheler men nysandardy qaraý usynyldy. Muny jarysqa ainaldyrmaýymyz kerek. Abai, Tóle bi, Ábilqaiyr han jáne halqymyzdyń ózge de uly qairatkerleriniń kósheleri mádeni-tarihi turǵyda asa qundy. Sondyqtan, komissiia osyndai sheshim qabyldady", - dedi Dáýren Abaev.
Aita keteiik, buǵan deiin Respýblikalyq onomastikalyq komissiia Atyraý, Aqtóbe, Qostanai, Jambyl oblystarynyń ákimshilik ortalyqtaryndaǵy qaita ataý úshin usynylǵan kósheler men ózge obektilerdi anyqtai otyryp, qaita qaraýdy usynǵan edi.
