Oqý jylynyń birinshi toqsany aiaqtalǵanmen, áli de kompiýterlik tehnikalardy jetkizýmen ainalysýdamyz. Bul týraly QR Bilim jáne ǵylym ministrliginiń Facebook jelisindegi resmi paraqshasynda ótken jinalysta aityldy, dep habarlaidy QazAqparat.
QR Bilim jáne ǵylym vitse-ministri Rústem Biǵari bilim basqarmalarynyń basshylarymen «Jergilikti ákimdikterdiń kompiýterlik tehnikany satyp alý máselelerine qatysty» taqyrybynda jinalys ótkizdi.
«Ministrliktiń ózi kompiýterlik tehnikany satyp alýǵa qatyspaidy. Ony jergilikti ákimdik ózi satyp alady, ol úshin barlyq jaǵdaidy jasadyq. Ministrlik tamyz aiynda kompiýter satyp alý baiqaýy ashyq túrde ótýi kerektigi jáne arnaiy komissiia qurý týraly hat jibergen bolatyn. Eń basty másele – tehnikanyń sapasy jáne jetkizilý merzimi. Júrgizilgen monitoring boiynsha, keibir aimaqqa sapasyz tehnika jetkizilgeni týraly nemese belgilengen merzimde jetkizilmegeni týraly aqparat bar. Sondyqtan bul máselege qatysty aimaqtardyń jaýabyn tyńdamaqpyn», - deidi QR Bilim jáne ǵylym vitse-ministri Rústem Biǵari.
Almaty oblysyna jetkizilgen tehnikanyń 50-i jaramsyz bolyp shyqqan jáne olar iske jaramdy tehnikamen aýystyrylǵan. 5-7 kún ishinde atalǵan tehnikalar mektepterge jetkiziledi. Al Aqtóbe oblysyna jetkizilgen tehnikalardyń ishinde 15 kompiýterde aqaý bolǵan jáne ol birden aýystyrylǵan.
Onyń aitýynsha, ár kompiýter berilgen balanyń atyna tirkelýi qajet.
«Ákimdik aldymen kompiýterlerdi tekserip alyp, odan keiin ǵana oqýshylarǵa berýi kerek. Olardyń qyzmet kórsetýge jaramdy merzimi 1 jyl bolýy qajet. Úkimettiń qoldaýymen 4 otandyq kompaniia kompiýterlik tehnika jetkizýmen ainalysady. Úkimettiń qoldaýymen olar úlken kólemde tapsyrys oryndaidy. Otandyq kompaniia bolǵanyna qaramastan, olarǵa qoiylatyn talap ta joǵary bolýy kerek, olardan sapa talap etý kerek. Jaramsyz tekhnikalardy alǵan soń ornyna basqa tehnikany jyldam berýi kerek. Oqý jylynyń birinshi toqsany aiaqtalǵanmen, áli de tehnikalardy jetkizýmen ainalysýdamyz. Osyǵan qatysty kóp suraq týyndaidy», - deidi ol.
