Onlain/oflain formattarda «óńirlerdegi ministrlik kúnderi» uiymdastyrylady. Bul týraly QR Aqparat jáne qoǵamdyq damý ministri Aida Balaeva málim etti, dep habarlaidy QazAqparat.
«Memlekettiń negizgi ideologiialyq organdarynyń biri retinde bizdiń ministrlikke júkteletin mindetterdiń orny erekshe. Vedomstvo tikelei jaýap beretin eki úlken baǵyt: aqparattyq saiasat pen qoǵamdyq qatynastar. Ekeýi de el Prezidenti erekshe senip tapsyrǵan, jaýapkershiligi mol san túrli saladan turady. Eń bastysy – eldiń rýhani kemeldigi men saiasi turaqtylyǵy, qoǵamdyq berekesi men bastaǵan isiniń baiandylyǵy kóp jaǵdaida osy bizdiń ministrliktiń jumysyna bailanysty. Bul jaýapkershilikti biz jaqsy túsinemiz, salmaǵyn sezinemiz», - dedi A. Balaeva ministrliktiń keńeitilgen alqa májilisinde.
Osy oraida ol aldaǵy aptadan bastap qandai is-sharalar uiymdastyrylatynyn aitty.
«Dese de, bul týraly halyqtyń, ásirese, óńirlerdegi jurtshylyqtyń keńinen bilip, bar máselemen bóliskeni durys. Sol sebepti, kelesi aptadan bastap el aldyna shyǵyp, onlain/oflain formattarda «óńirlerdegi ministrlik kúnderin» uiymdastyrýdy josparlap otyrmyz», - dedi vedomstvo basshysy.
«Barshańyzǵa málim, Memleket basshysy Qasym-Jomart Kemelulynyń «Halyqtyń únine qulaq asatyn memleket» tujyrymyn qalyptastyrý – árbir memlekettik organnyń tikelei mindeti. Árine, bul kontseptsiia memleket tek «tyńdaýshy» ǵana emes, qajet aqparatqa jalpaq jurttyń qolyn jetkizip, árdaiym ózara bailanysta bolýdy kózdeidi. Bunyń bári, sóz joq, halyqqa bir taban jaqyndaýda 2020 jylǵa beretin oń baǵa dep bilemin», - dedi Balaeva.
