Parlament Májilisiniń jalpy otyrysynda depýtat Gúldara Nurymova elimizdiń qai óńirlerinde dárigerler tapshy ekenin aitty, dep habarlaidy "Ult aqparat".
«Qazaqstan Respýblikasynyń Prezidenti Q.K.Toqaevtyń 2020 jylǵy 1 qyrkúiektegi halyqqa Joldaýynyń basty baǵyttarynyń biri densaýlyq saqtaý júiesin, atap aitqanda, sapaly jáne qoljetimdi meditsinany damytý bolyp tabylady. Ásirese, pandemiiadan keiin, densaýlyq saqtaý salasyn jetildirýdiń mańyzdylyǵy artyp otyr. Sonyń biri - dárigerlerdiń jetispeýshiligi. Bul halyqqa kórsetiletin meditsinalyq kómektiń sapasyna tikelei áser etedi. Resmi málimetterge sáikes, densaýlyq saqtaý júiesindegi meditsina qyzmetkerleriniń sany 253 883 adamdy qurasa, onyń 74 046-sy dárigerler, 180 myńǵa jýyǵy orta meditsinalyq qyzmetkerler», - dedi depýtat Úkimet basshysynyń orynbasary Eraly Toǵjanovtyń atyna joldaǵan saýalynda.
Onyń aitýynsha, 2021 jylǵy 1 qańtardaǵy derekter boiynsha meditsina salasynda kadr tapshylyǵy 4 662 dárigerdi qurady.
«Óńirler boiynsha kadrlardyń asa jetispeýshiligi Qaraǵandy, Almaty, Batys Qazaqstan, Aqmola, Qostanai, Shyǵys Qazaqstan, sondai-aq Jambyl, Atyraý, Túrkistan oblystarynda baiqaldy.
«Dárigerlerdiń tapshylyǵy oqý merziminiń uzartylýyna, qalalar men monoqalalarda jas mamandardy qoldaý mehanizminiń joqtyǵyna bailanysty, ásirese, meditsinalyq joǵary oqý oryndary joq óńirlerde sezilip otyr», - dedi Gúldara Nurymova.
«Ózgerister joly: Ár azamatqa laiyqty ómir!» atty «Nur Otan» partiiasynyń 2025 jylǵa deiingi sailaýaldy baǵdarlamasy Jol kartasynyń oryndalýyna sáikes, meditsinalyq joǵary oqý oryndaryna granttar sanyn tiisinshe 2021 jylǵy 4685-ten 2025 jyly 5185-ke deiin ulǵaitý kózdelip otyr. Granttar sanyn josparly ulǵaitý elimizdegi meditsina kadrlarynyń sanyn arttyryp qana qoimai, meditsina mekemeleriniń mamandarǵa degen qajettiligin qamtidy», - dedi depýtat.
Joǵaryda aitylǵandardyń negizinde ol birqatar kelesi máselelerdi qarastyrýdy suraidy:
1. «2020-2025 jyldarǵa arnalǵan óńirlerdi damytýdyń memlekettik baǵdarlamasyna» tolyqtyrýlar engizý arqyly monoqalalardaǵy jas mamandardy aýyldardaǵy jas mamandarmen teńdei áleýmettik kómekpen jáne turǵyn úimen qamtamasyz etý.
2. Meditsinalyq kadrlar jetispeitin aimaqtardan kelgen abitýrientter úshin meditsinalyq bilim berý mekemelerinde oqýǵa arnalǵan granttar sanyn ulǵaitý boiynsha kvotalardy ázirleý.
3. Dárigerlerdiń tapshylyǵyn eskere otyryp, QR Bilim jáne ǵylym ministrliginiń tarapynan meditsinalyq JOO-larǵa granttar sanyn kóbeitý.
4. Jas mamandardy bólý jónindegi komissiia óńirlerdiń kadrlarǵa qajettiligin eskerýi kerek.
