QR Qarjy ministri Erulan Jamaýbaev biýdjet qarajatyn igermegen óńirlerdi atady, dep habarlaidy QazAqparat.
«Jergilikti biýdjetterdiń shyǵystary 7,1 trln teńgeni qurady, atqarylmaǵany - 208 mlrd teńge. Biyl óńirlerge 2,2 trln teńge somasynda nysanaly transfertter kózdelgen. Aldyn ala derekter boiynsha olarǵa 1 jeltoqsanǵa deiin 2 trln teńge bólingen. Olardyń 96,7% igerilgen. Atqarylmaǵany - 66 mlrd teńge, onyń ishinde 12 mlrd teńge únemdelse, 54 mlrd teńge igerilmegen», - dedi Erulan Jamaýbaev Úkimet otyrysynda.
Qarajatty igere almaǵan óńirler arasynda Nur-Sultan, Almaty qalalary, Aqtóbe, Batys Qazaqstan jáne Atyraý oblystary bar.
«Jergilikti atqarýshy organdardyń aqparatyna sáikes, jyl qorytyndysynda nysanaly transfertter boiynsha 26 mlrd teńge somasynda jospardyń oryndalmaýy boljanyp otyr. Onyń negizgi sebepteri: memlekettik satyp alý boiynsha únemdeý; josparǵa qaraǵanda alýshylardyń naqty sanynyń azaiýy; jumys júrgizý kestesinen artta qalý, jumys kóleminiń oryndalmaýy. Sondyqtan, respýblikalyq biýdjettik baǵdarlama ákimshileri men jergilikti atqarýshy organdar biýdjet qarajatyn tiimdi jáne tolyq igerý úshin barlyq sharalardy qabyldaýy qajet», - dedi Qarjy ministri.
