Foto: TJM
El óńirlerinde qysqy kezeńdegi tótenshe jaǵdailardyń aldyn alýǵa jáne olardy joiýǵa azamattyq qorǵaý memlekettik júiesiniń aýmaqtyq kishi júiesiniń ázirligin arttyrýǵa baǵyttalǵan «Qys-2025» komandalyq-shtabtyq oqý-jattyǵýlary ótti, dep habarlaidy TJM baspasóz qyzmeti.
Vedomstvo atap ótkendei, oqý-jattyǵýdyń negizgi maqsaty — basqarý organdarynyń, azamattyq qorǵaý kúshteri men quraldarynyń ózara is-qimylyn pysyqtaý, yqtimal qysqy TJ-ǵa den qoiýdyń jedeldigi men tiimdiligin arttyrý.
Batys Qazaqstan oblysynda úsh qalalyq lokatsiiada jergilikti atqarýshy organdardyń, politsiianyń jáne volonterlerdiń qatysýymen qysqy tótenshe jaǵdailarǵa den qoiý is-qimyldary pysyqtaldy. «Jaiyqjylýqýat» AQ men «Qazaqgaz aimaq» AQ basqarý signaldary jetkizilip, taqyryptyq jattyǵýlar ótkizildi. TJ saldaryn joiý kezindegi jaǵdaidy baǵalaý jáne sheshim qabyldaý algoritmi pysyqtaldy. Balyqshynyń joǵalýyn modeldeý boiynsha izdestirý-qutqarý is-sharalary jeke uiymdastyryldy: qyzmettik itti qoldana otyryp jaǵalaý syzyǵyn tekserý, jaiaý syzyqtyq izdeý jáne jedel kómek kórsetý sharalary atqaryldy. Óńirde barlyǵy shamamen 600 adam jáne 200 tehnika jumyldyryldy.
Pavlodar oblysynda oqý-jattyǵý Kenjekól aýylynda ótti. Qysqy kezeńge óńirde 188 jylytý pýnkti daiyndaldy, sonyń ishinde 11-i jol-paidalaný basqarmalarynyń bazalarynda ornalasqan. Bul pýnktter 20 myńnan astam adamdy qabyldai alady, sondai-aq 4300 tósek-orynmen qamtamasyz etilgen. Yqtimal tótenshe jaǵdailardy joiý úshin quramynda 2788 adam jáne myńnan astam qar tazalaityn, injenerlik, evakýatsiialyq jáne ótimdiligi joǵary tehnikalar bar top jasaqtaldy. TJD bólimsheleri ótimdiligi joǵary 90 tehnikamen jabdyqtalǵan. Daǵdarys jaǵdailarynda qulaqtandyrý júieleriniń jumysy jáne jedel qyzmetterdiń ózara is-qimyly tekserildi. Tórt oqý-jattyǵý stsenariii pysyqtaldy: respýblikalyq mańyzy bar trassadaǵy jol-kólik oqiǵasynyń saldaryn joiý, boran saldarynan joldardyń jabylýy kezindegi is-qimyldar, jylytý pýnktin ornalastyrý, sondai-aq energiiamen jabdyqtaý nysanyndaǵy avariialyq-qalpyna keltirý jumystary.
Shymkent qalasynda ótken jyldardyń taldaýyna negizdelgen qysqy tótenshe jaǵdailarǵa den qoiý boiynsha eki kúndik oqý-jattyǵý ótkizildi. Tynys-tirshilikti qamtamasyz etý nysandaryna, atap aitqanda sýmen jabdyqtaý, jylý berý jáne energiiamen jabdyqtaý júielerine bólindi. Oqý-jattyǵýlar aiasynda 11 oqý núktesinde praktikalyq sharalar júrgizildi. Praktikalyq bólimde Qarataý, Eńbekshi jáne Turan aýdandarynda sý deńgeiiniń shartty kóterilýinen týyndaityn sý basýdyń aldyn alý is-sharalary atqaryldy. Mamandar halyqty evakýatsiialaý, arnalardy tazartý, bógenderdi nyǵaitý jáne injenerlik júielerdiń úzdiksiz jumysyn qamtamasyz etý jumystaryn pysyqtady. Ekinshi kúni shartty avariialar joiyldy: gaz qubyrynyń jarylýy jáne «3-Energoortalyq» AQ nysanynda órt, A-2 avtojolynda gaz qubyrynyń zaqymdanýy, transformatordyń isten shyǵýy jáne Qarataý aýdanynda elektr men gaz berýiniń ýaqytsha toqtaýy. Jumystarǵa 216 adam jáne 41 birlik tehnika jumyldyryldy. Barlyq shartty tótenshe jaǵdailar der kezinde joiylyp, qyzmetter daiyndyq deńgeiin kórsetti.
«Qys-2025» oqý-jattyǵýlary barlyq qyzmetterdiń úilesimdi jumysyn jáne óńirlerdiń qysqy kezeńge daiyndyǵyn kórsetti. Qorytyndylar jasalyp, is-qimyldardyń tiimdiligi men qurylymdardyń ózara árekettestigi taldandy, azamattyq qorǵaý júiesin odan ári jetildirý boiynsha usynymdar ázirlendi.
