Foto: Úkimet
Úkimette Premer-ministrdiń orynbasary – ulttyq ekonomika ministri Serik Jumanǵarinniń tóraǵalyǵymen kóktemgi egis jumystaryn daiarlaý jáne ótkizý jónindegi jedel shtabtyń otyrysy ótti, dep habarlaidy Ult.kz.
Aýyl sharýashylyǵy vitse-ministri Azat Sultanovtyń habarlaýynsha, 2026 jyly óńirler áleýmettik mańyzy bar kókónisterdiń, eń aldymen kartop pen sábizdiń egis alqaptaryn ulǵaitýy qajet.
Onyń aitýynsha, ótken jyly kartop egisin arttyrý boiynsha maqsatty jumys júrgizilip, uiymdasqan sharýashylyqtardaǵy egis kólemi 12,5 myń gektarǵa ulǵaiǵan.
"Ónim kólemi naryqtaǵy baǵa turaqtylyǵyna tikelei áser etedi. Osyǵan bailanysty óńirler túpkilikti egis qurylymyn bekitý kezinde sábiz egisin ulǵaitý mindetin eskerýi qajet", — dep atap ótti vitse-ministr.
Sondai-aq boljamdy egis qurylymynda qaraqumyq egis alqaptaryn kezeń-kezeńimen ulǵaitý kózdelgen. 2026 jyly onyń egisin 10 myń gektarǵa – 101 myń gektarǵa deiin keńeitý josparlanyp otyr (2025 jyly – 91 myń gektar). Óńirlerge belgilengen indikatorlarǵa qol jetkizýdi qamtamasyz etý tapsyryldy.
Júgeri egisin keńeitýge de erekshe nazar aýdaryldy. Alańdardyń aitarlyqtai ulǵaiýy Jambyl oblysynda júgerini tereń óńdeý boiynsha Fufeng Group kompaniiasynyń jańa tik integratsiialanǵan ónerkásiptik parkin, sondai-aq Túrkistan oblysyndaǵy «Qazkrahmal» JShS-niń krahmaldy sirne óndirý zaýytyn shikizatpen qamtamasyz etý úshin qajet.
Jańa óndiristerdiń qajettiligin tek ońtústik óńirler esebinen qamtamasyz etý múmkin emestigi atap ótildi. Osyǵan bailanysty úsh soltústik astyq egetin óńirde júgeri egis alqaptaryn árqaisysynda orta eseppen 15 myń gektarǵa ulǵaitý mindeti qoiyldy.
Aýyl sharýashylyǵy ministrligi óz tarapynan Ulttyq agrarlyq ǵylymi-bilim berý ortalyǵymen jáne Memlekettik sort synaý komissiiasymen birlesip, óńirlerge ádistemelik jáne tehnologiialyq qoldaý kórsetýge daiyn ekenin bildirdi. Bul soltústik óńirlerdiń jaǵdaiyna beiimdelgen ósirý tehnologiialaryn engizý jáne sáikes sorttardy irikteý bóliginde júzege asyrylady.
Qosymsha AShM júgeri ósirýde praktikalyq kómek kórsetýge daiyn ekenin bildirgen qytailyq kompaniiamen kezdesý ótkizdi. Qytai tarapy topyraq-klimattyq jaǵdailary uqsas Qytaidyń soltústik óńirlerinde júgeri ósirý tájiribesimen bólisýge, sondai-aq osyndai jaǵdailarǵa beiimdelgen tehnologiialar men sorttardy usynýǵa daiyn. Osyǵan bailanysty óńirlerge halyqaralyq tájiribeni eskere otyryp, júgeri egisin keńeitý baǵytyndaǵy jumysty jandandyrý usynyldy.
Sondai-aq óńirlerde mineraldy tyńaitqyshtardy jóneltý bastalǵany atap ótildi. Aýyl sharýashylyǵy ministrligi «Qazfosfat» JShS-men 2026 jyly ammofostyń qosylǵan qun salyǵyn eseptemegendegi tonnasyna 254 myń teńge deńgeiinde (ótken jylmen salystyrǵanda 15%-ǵa joǵary) bekitilgen baǵa belgileý týraly memorandýmǵa qol qoidy. Qazirgi ýaqytta aýyl sharýashylyǵy taýar óndirýshilerimen sharttar jasasý jáne jetkizý kestelerin kelisý jumystary júrgizilýde.
2025 jyly kóktemgi egis jáne jinaý jumystaryn júrgizý úshin 7 myńnan astam aýyl sharýashylyǵy óndirýshisine jalpy somasy 501,5 mlrd teńge kóleminde kredit berilip, 7 mln gektardan astam egis alqaby qamtyldy. Qazirgi ýaqytta Agrarlyq kredit korporatsiiasy arqyly egis naýqanyna 126 fermerge 17 mlrd teńge kóleminde qarjylandyrý maquldandy, taǵy 235 óndirýshiniń 76 mlrd teńgege ótinimderi qaralýda.
