Ońtústik Qazaqstan oblysyn mádeniettiń besigi desek qatelespeimiz. Sebebi respýblika kólemindegi ónerpazdardyń basym bóligi osy óńirden shyǵyp júr. Munan tys túrli ázil-syqaq teatrlary da osy kúngei ólkeniń mádenietine jan bitirip, tamyryna qan júgirtip otyr.
Atap aitar bolsaq, táýelsizdik jyldary oblysta 730 mádeniet jáne óner mekemeleri salynyp nemese qaita jańaryp, halyqqa mádeni qyzmet kórsetip keledi. Onyń 423-i kitaphana bolsa, 254-i klýb, 25 mýzei, 1 kórkemsýret galereiasy, 8 kásibi teatr, 2 kinoteatr, 8 saiabaq, 3 ortalyq, 1 oblystyq filarmoniia, 1 «Ońtústikfilm» mekemesi, 1 «Ońtústik-Tsirk» mekemesi, 1 «Túrkistan saraiy», 1 kórme ortalyǵy jáne 1 zoobaq bar.
Egemendigimizdiń alǵashqy kezeńinde naryqtyq ekonomikaǵa ótý – mádeniet salasyna da óz áserin tigizdi. Qarjylandyrýdyń jetkiliksizdiginen mádeniet jáne óner mekemeleri jabyla bastady. Alaida Elbasymyz N.Á.Nazarbaev 2000 jyldy «Mádenietti qoldaý» jyly dep jariialaýyna bailanysty mádeniet salasyna tiisti qarjy kózderi qarastyrylyp, jabylǵan mádeniet oshaqtary kezeń-kezeńimen qalpyna keltirilip, qaita ashý jumystary júrgizildi. Sonyń arqasynda kúngei oblysta 4 teatr Elbasynyń qatysýymen ashyldy. Sh.Qaldaiaqov atyndaǵy oblystyq filarmoniiaǵa jańa ǵimarat salynyp, el igiligine berildi. Munan bólek, respýblikada úshinshi bolyp «Ońtústik-Tsirk» mekemesi kórermenderine esigin aiqara ashty. Keńes dáýirinde kinoprokat qyzmetin atqarǵan mekeme «Ońtústikfilm» mekemesi bolyp qaita qurylyp, jyl saiyn 250-ge jýyq derekti filmder men beinematerialdar daiyndap, jastar men balalarǵa kino kórsetilimder jáne kino festivalder uiymdastyryp keledi.
«Mádeni mura» memlekettik baǵdarlamasy aiasynda Túrkistan qalasyndaǵy oblystyq tarihi-mádeni-etnografiialyq ortalyq, Rýhaniiat, Ábý-Nasyr ál-Farabi, Hakim Abai, Erlik, beineleý óneri mýzeii jáne ádet-ǵuryp jáne salt-dástúr, tarihi-mádeni murany qorǵaý, qalpyna keltirý jáne paidalaný jónindegi ortalyqtar óz jumystaryn bastap, oblystyq tarihi-ólketaný mýzeiiniń jańa ǵimaraty salyndy.
Osynaý jyldar ishinde qazirgi zamannyń estetikalyq talabyna sai halyq shyǵarmashylyǵynyń jáne is-sharalardyń jańa formalaryn tabý, jas talanttarǵa qoldaý kórsetý maqsatynda túrli baiqaýlar men festivalder uiymdastyrylyp keledi.
Osylaisha ońtústik óńir de Elbasy N.Nazarbaevtyń «Bolashaqqa baǵdar: rýhani jańǵyrý» baǵdarlamalyq maqalasyna ún qatý maqsatynda mádeniet salasynda halyqaralyq, respýblikalyq deńgeidegi birqatar igilikti is-sharalar ótkizip, bolashaqqa nyq qadam jasaýda.
