Aýyl sharýashylyǵy ministri Saparhan Omarov elimizde áleýmettik mańyzy bar azyq-túliktiń mólsheri jaily málimetpen bólisti, dep habarlaidy QazAqparat tilshisi.
«Memleket basshysynyń tapsyrmasymen Aýyl sharýashylyǵy ministrligi Saýda jáne integratsiia ministrligimen, ákimdiktermen birge búgingi tańda jedel shtab qurdy. Shtabtyń negizgi maqsaty – halyqty basty azyq-túlik túrlerimen qamtamacyz etý. Ákimdiktermen qazir turaqty bailanysta otyrmyz. Negizinen aimaqtardaǵy turaqtandyrý qorlaryndaǵy azyq-túliktiń tolymdylyǵyna, óndirýshilerdiń qoimalaryna, saýda núktelerine monitoring júrgizilýde. Qolda bar jedel málimetke sáikes qazirgi tańda respýblikada 1,2 mln tonna áleýmettik mańyzy bar taýar bar», - dedi Saparhan Omarov OKQ-da ótken baspasóz máslihatynda.
Aýyl sharýashylyǵy ministriniń aitýyna qaraǵanda áleýmettik mańyzy bar taýardyń bul kólemi halyqty 5-6 ai kóleminde qamtamasyz etýge tolyǵymen jetkilikti.
«Bul tek qor ǵana. Odan bólek azyq-túliktiń barlyq túri óndirilip te jatyr. Óńdeýge baǵyttalatyn shikizat qory barshylyq. Óńdeýshi kásiporyndar qajet bolǵan jaǵdaida óndiristik qýattylyqty arttyrady», - dedi ol.
Saparhan Omarov qajettilik qazirgi tańda 80 paiyzǵa, al azyq-túliktiń keibir túri boiynsha 100 paiyzǵa tolyq ekenin jetkizdi.
«Bizdiń negizgi azyq-túlik túrleri – bidai uny. Bidai unynan úsh million tonna óndirdik. Bul ishki qajettilikti 204 paiyzdyq deńgeide jabýǵa jetkilikti. 144 myń tonna kúrish óndirildi. Al qajettilik mólsheri – 76 myń tonna. 190 paiyzǵa jaýyp otyrmyz. Sol sekildi 165 myń tonna makaron óndirilýde. Qajettilik – 150 myń tonna. 3,9 million tonna kartop óndirýdemiz. Ishki qajettilik kartop boiynsha 107 paiyzǵa jabylǵan. Siyr, qoi, jylqy, shoshqa eti jaǵynan ýaiym joq», - dedi ol.
Eske sala ketsek buǵan deiin atalmysh baspasóz máslihatynda Saýda jáne integratsiia ministri Baqyt Sultanov koronavirýs infektsiiasyna bailanysty sýpermarketter men bazarlarda týyndaǵan dúrbeleńge bailanysty qazaqstandyqtardy sabyrǵa shaqyrǵan bolatyn.
