Túrkistan oblysynyń ákimi Ómirzaq Shókeev Úkimetten óńirdegi sharýalardyń qyryqqabatyn ótkizip berýge kómek surady. Onyń aitýynsha aimaqta qazir satylmai jatqan 250 myń tonna qyryqqabat bar, dep habarlaidy "Ult aqparat".
«Túrkistan oblysynda 300 myń tonna qyryqqabat ósirdi. Biraq qazir Reseiden suranys birden tómendep ketti. Biz oblystardyń bárimen memorandýmǵa qol qoiǵanymyzben olar da almai jatyr. Sondyqtan oblysta osyndai ózekti máselemen betpe-bet keldik», - dedi Úkimet otyrysyna onlain rejimde qosylǵan Ómirzaq Shókeev.
Túrkistan óńiriniń ákimi qyryqqabattyń bir kelisi 10-15 teńgege deiin tómendep ketkenin jetkizdi.
«Fermerler úlken shý kóterip jatyr. Sondyqtan ministrliktermen birge múmkindikterdi qarastyrǵan jón sekildi. Bálkim oblystarmen, Reseidegi logistikalyq kompaniialarmen birge osy jumysqa kirisken abzal. Bizde qazir 250 myń tonna qyryqqabat daiyn tur. Ony satpasaq úlken problemaǵa ainalatyn sekildi», - dedi Ómirzaq Shókeev.
Bul rette Úkimet basshysy Asqar Mamin Aýyl sharýashylyǵy ministri Saparhan Omarovqa Túrkistannyń sharýalaryna kómek kórsetý kerektigin tapsyrdy.
