Túrkistan oblysynyń ákimi Ómirzaq Shókeev pen «Qazsýshar» mekemesiniń basshylary búgin Maqtaaral aýdanyndaǵy sý tasqyny máselesin retteý boiynsha Ózbekstannyń Syrdariia oblysyna attanyp ketti. Bul týraly oblys ákiminiń orynbasary Sáken Qalqamanov kezekti brifing barysynda málimdedi, dep habarlaidy "Ult aqparat".
Sáken Qalqamanovtyń aitýynsha, Qazaqstannan tasqyn sýdy toqtatý boiynsha barǵan top tiisti ministrlik ókilderimen kezdesip, kelissózder júrgizedi. Sý bosatý jumystaryn bir júiege keltirmek.
«Arnaiy top Ózbekstannyń sý ministri Hamraevpen jáne Syrdariia oblysynyń basshylyǵymen kezdesip, kelissózder júrgizedi. Bul kezdesýdiń nátijesin biz qosymsha habarlaityn bolamyz. Jalpy bul jaǵdai eki eldiń úkimeti tarapynan talqylanyp, sheshiletin bolady. Sońǵy málimet boiynsha búgingi kúnge deiin aýdanǵa 300 mln tekshe metrdei sý kelgen. Mundai kólemdegi sý alǵash ret bolyp otyr. Dese de qaýip áli seiilgen joq dep aitýǵa bolady. Óitkeni Ózbekstan tarapynan áli qansha sý keletini belgisiz. Naqty aqparat búgin ǵana beriletin shyǵar, sonda biz boljam jasai alamyz. Sebebi Ózbekstanmen sý týraly málimet almasý bir júiege keltirilmegen», - dedi Sáken Qalqamanov.
Onyń aitýynsha, Ferdoýsi aýylyn tolyqtai sý basqan. Myrzakent aýylyn da tolyqtaý sý basyp qalmas úshin bóget salynýda.
«Maqtaaral aýdanynda taǵy sý tasqyny bolýy múmkin degen jeti eldimeken anyqtalyp, onda maldy basqa jaqqa aidalyp jatyr. Al, sý basqan aýyldardan 3 115 siyr, 1 101 jylqy, 585 qoi, 34 túie kóshirilgen. Sýǵa ketken maldyń sany ázirge belgisiz. Bul jumystarǵa tasqyn sýdyń áli de toqtamai turǵany qolbailaý bolýda. Ólgen mal basyn sanaý keiin júrgiziledi.
