Ómirzaq Shókeev Túrkistan oblysynyń ákimi qyzmetinen bosatyldy, - dep habarlaidy "Ult aqparat" Aqorda saityna silteme jasap.
"Memleket basshysynyń Jarlyǵymen Ómirzaq Estaiuly Shókeev Túrkistan oblysynyń ákimi laýazymynan bosatyldy", - delingen habarlamada.
Aita keteiik, Shókeev oblysty 2019 jyldyń aqpanynan beri basqardy. Buǵan deiin Túrkistan oblysy ákiminiń otstavkaǵa ketýge ótinish bergeni habarlanǵan edi.
Ómirzaq Estaiuly 1964 jyly 12 naýryzda Túrkistan oblysy Báidibek aýdany Shaian qalasynda dúniege kelgen.
Ol Máskeý ekonomikalyq-statistikalyq institýtyn bitirgen. Institýtty bitirgennen keiin QazKSR Memlekettik josparlaý janyndaǵy AÁK ǴZI kishi ǵylymi qyzmetkeri; QR Prezidenti janyndaǵy Joǵary ekonomikalyq keńestiń keńesshisi; QR Prezidenti Apparaty men Ministrler Kabineti Qarjy jáne eńbek bólimi meńgerýshisiniń orynbasary; OQO ákimshiligi basshysynyń orynbasary boldy. Ár jyldary QR ekonomika ministri; QR ekonomika jáne saýda ministri; QR premer-ministriniń orynbasary; "Bank Týran-Álem" JAQ basqarma tóraǵasy boldy"; QR Prezidenti Ákimshiligi basshysynyń orynbasary qyzmetterin atqardy.
Sondai-aq Qostanai oblysynyń ákimi, Astana qalasynyń ákimi jáne Ońtústik Qazaqstan oblysynyń ákimi bolǵan. 2007 jyly tamyzda Shókeev Qazaqstan Premer-ministriniń orynbasary bolyp taǵaiyndaldy. 2011 jyldan 2017 jylǵa deiin "Samuryq-Qazyna" ulttyq ál-aýqat qoryn (UÁQ) basqardy.
