Arys qalasyn qaita qalpyna keltirý jumystaryna qatysqan qurylysshylar bárin ýaqtyly aiaqtap, elderine qaityp jatyr.
Búginde 17 sektordyń barlyǵynda kúrdeli jóndeý jumystary tolyq aiaqtalǵan. Bul týraly Arysta ótken josparly apparattyq jiynda aityldy, dep habarlaidy "Ult aqparat".
Túrkistan oblysynyń ákimi Ómirzaq Shókeev tóraǵalyq etken otyrysta Arysta atqarylyp jatqan jumystar men jol, káriz júiesi men qujattandyrý máselesi jaily sońǵy málimetter sóz boldy. Jarylystan 8 myńnan astam turǵyn úidiń 7634-i zaqymdanǵan bolsa, onyń 500-ge jýyǵy múldem jaramsyz kúige túsken bolatyn. Al, tolyq súrilip tastap, qaita kóterilgen nysandardyń tiziminde kópqabatty úsh turǵyn úi bar. Bul kúnde úilerdiń qurylysy da aiaqtalýǵa taiady. Qazir ishki árleý jumystary júrip jatyr. Atalǵan jumystarǵa oblys boiynsha 3 myńǵa jýyq adam tartyldy.
«Úsh aida tolyq jańarǵan Arys qalasynda júrgizilgen aýqymdy jumys bárimiz úshin jaqsy tájiribe boldy. Az ǵana ýaqytta tutas bir qalany qaita aiaqqa turǵyzý tarihta bolmaǵan. Bul elimizdegi birlik pen yntymaqty aishyqtaityn kórinis. Mundai jaǵdai endi qaityp basymyzǵa túspesin», - dedi oblys ákimi Ómirzaq Shókeev.
Jiynda Túrkistan qalasynyń ákimi Rashid Aiýpov kóne shahardaǵy qurylys jumystaryn da baiandap ótti. Búginde oblys ortalyǵy 16 sektorǵa bólinip, olarǵa oblystyń basqarmalary men aýdan-qalalary, qalalyq ákimdiktiń bólimderi jaýapty bolyp bekitilgen. Ákimniń aitýynsha, barlyq aýmaqtardyń jumystary tynymsyz júrgizilip jatyr.
Bul rette Ómirzaq Shókeev qala basshysyna halyqpen jumys istep, tazalyq men tártipti basty nazarda ustaýdy tapsyrdy. Túrkistan qalasyn kórkeitý jumysyn baqylaý oblys ákiminiń orynbarasy Ulan Tájibaevqa júkteldi. Aldaǵy ýaqytta Túrkistanda úlgili kóshe, aýlalar anyqtalyp, úzdikterge qoshemet kórsetiletin boldy.
