ارىس قالاسىن قايتا قالپىنا كەلتٸرۋ جۇمىستارىنا قاتىسقان قۇرىلىسشىلار بەرٸن ۋاقتىلى اياقتاپ, ەلدەرٸنە قايتىپ جاتىر.
بٷگٸندە 17 سەكتوردىڭ بارلىعىندا كٷردەلٸ جٶندەۋ جۇمىستارى تولىق اياقتالعان. بۇل تۋرالى ارىستا ٶتكەن جوسپارلى اپپاراتتىق جيىندا ايتىلدى, دەپ حابارلايدى "ۇلت اقپارات".
تٷركٸستان وبلىسىنىڭ ەكٸمٸ ٶمٸرزاق شٶكەەۆ تٶراعالىق ەتكەن وتىرىستا ارىستا اتقارىلىپ جاتقان جۇمىستار مەن جول, كەرٸز جٷيەسٸ مەن قۇجاتتاندىرۋ مەسەلەسٸ جايلى سوڭعى مەلٸمەتتەر سٶز بولدى. جارىلىستان 8 مىڭنان استام تۇرعىن ٷيدٸڭ 7634-ٸ زاقىمدانعان بولسا, ونىڭ 500-گە جۋىعى مٷلدەم جارامسىز كٷيگە تٷسكەن بولاتىن. ال, تولىق سٷرٸلٸپ تاستاپ, قايتا كٶتەرٸلگەن نىسانداردىڭ تٸزٸمٸندە كٶپقاباتتى ٷش تۇرعىن ٷي بار. بۇل كٷندە ٷيلەردٸڭ قۇرىلىسى دا اياقتالۋعا تايادى. قازٸر ٸشكٸ ەرلەۋ جۇمىستارى جٷرٸپ جاتىر. اتالعان جۇمىستارعا وبلىس بويىنشا 3 مىڭعا جۋىق ادام تارتىلدى.
«ٷش ايدا تولىق جاڭارعان ارىس قالاسىندا جٷرگٸزٸلگەن اۋقىمدى جۇمىس بەرٸمٸز ٷشٸن جاقسى تەجٸريبە بولدى. از عانا ۋاقىتتا تۇتاس بٸر قالانى قايتا اياققا تۇرعىزۋ تاريحتا بولماعان. بۇل ەلٸمٸزدەگٸ بٸرلٸك پەن ىنتىماقتى ايشىقتايتىن كٶرٸنٸس. مۇنداي جاعداي ەندٸ قايتىپ باسىمىزعا تٷسپەسٸن», - دەدٸ وبلىس ەكٸمٸ ٶمٸرزاق شٶكەەۆ.
جيىندا تٷركٸستان قالاسىنىڭ ەكٸمٸ راشيد ايۋپوۆ كٶنە شاھارداعى قۇرىلىس جۇمىستارىن دا بايانداپ ٶتتٸ. بٷگٸندە وبلىس ورتالىعى 16 سەكتورعا بٶلٸنٸپ, ولارعا وبلىستىڭ باسقارمالارى مەن اۋدان-قالالارى, قالالىق ەكٸمدٸكتٸڭ بٶلٸمدەرٸ جاۋاپتى بولىپ بەكٸتٸلگەن. ەكٸمنٸڭ ايتۋىنشا, بارلىق اۋماقتاردىڭ جۇمىستارى تىنىمسىز جٷرگٸزٸلٸپ جاتىر.
بۇل رەتتە ٶمٸرزاق شٶكەەۆ قالا باسشىسىنا حالىقپەن جۇمىس ٸستەپ, تازالىق مەن تەرتٸپتٸ باستى نازاردا ۇستاۋدى تاپسىردى. تٷركٸستان قالاسىن كٶركەيتۋ جۇمىسىن باقىلاۋ وبلىس ەكٸمٸنٸڭ ورىنباراسى ۇلان تەجٸباەۆقا جٷكتەلدٸ. الداعى ۋاقىتتا تٷركٸستاندا ٷلگٸلٸ كٶشە, اۋلالار انىقتالىپ, ٷزدٸكتەرگە قوشەمەت كٶرسەتٸلەتٸن بولدى.
