Elorda ákimi Altai Kólginov tótenshe jaǵdai rejimi kezinde qala turǵyndaryna qandai kómek kórsetilgendigin jariia etti, dep habarlaidy "Ult aqparat".
«Memleket basshysy Qasym-Jomart Kemeluly Toqaevtyń Jarlyǵyna sáikes, tótenshe jaǵdaidyń engizilgenine de bir aidan asa ýaqyt ótti. Árqaisyńyzdyń ómir súrý daǵdylaryńyzǵa ózgeris engizgen sheshimderdiń barlyǵy da sizderdiń qaýipsizdikterińiz úshin qabyldandy. Osynaý kezeńde azamattarymyz ony túsinip, qoldaý tanytyp keledi. Ol úshin rizashylyǵymyzdy bildiremiz. Qandai jaǵdai bolmasyn, basymyzǵa túsken aýyrtpalyq kezinde turǵyndarǵa memleket tarapynan qoldaý kórsetilip jatyr», - dep jazdy qala basshysy Facebook paraqshasynda.
Elorda ákiminiń atap ótýinshe, Elbasy Nursultan Ábishuly Nazarbaevtyń 20 naýryz kúni halqyna arnaǵan Úndeýi el azamattaryna oi salyp, turǵyndarymyzdy áleýmettik jaǵynan qoldaýǵa serpin berdi.
«QR Tuńǵysh Prezidenti: «Men ultty uiystyrýdyń, birlik pen qoǵamdaǵy kelisimniń mańyzdylyǵyn únemi aityp kelemin. Tutastyǵymyzdy taǵy bir ret dáleldeitin kún týdy. Elimizdiń barlyq azamattaryn tózimdilik tanytýǵa, memleket qabyldap jatqan sharalardy qoldaýǵa shaqyramyn. Birlik barda alynbaityn asý joq», - dep atap ótti. Osy Úndeýden keiin elordamyzda #Bizbirgemiz aktsiiasy aiasynda, «Nur Otan» partiiasynyń bastamasymen mynadai kómek kórsetildi: Birinshi, 9725 áleýmettik jaǵynan az qamtylǵan otbasyǵa azyq-túlik sebeti jetkizildi. Ekinshi, 7 sanat boiynsha (múmkindigi shekteýli azamattar, erekshe qajettiligi bar balalardy asyraýshylar, jetim balalar, kópbalaly analar, zeinetkerler jáne qiyn jaǵdaiǵa tap bolǵan otbasylar) áleýmettik az qamtylǵan 14 478 otbasyǵa 50 000 teńgelei kómek berildi», - dedi ol.
Sondai-aq onyń aitýynsha, volonterlerdiń kómegimen 500 myńdai meditsinalyq maska taratyldy. Myńǵa jýyq qala turǵynyna materialdyq emes kómekter kórsetildi. Mysaly: úiden shyǵa almaityn azamattarǵa, ásirese zeinetkerlerge qajetti dári-dármek, azyq-túligin jetkizý, maskalar men antiseptikter berý júzege asyryldy. 5 100 otbasyǵa antiseptikalyq jinaqtar berildi.
«Osy jumystarǵa tartylǵan 500-ge jýyq volonterdiń iship-jeminiń bári kómek bergen demeýshilerdiń esebinen júzege asyryldy. Osy aptada az qamtylǵan 40 myń otbasyǵa 2 mln meditsinalyq maska taratyla bastady. Bul jaǵdai – bárimizge birdei ortaq aýyrtpalyq. Elbasynyń tutastyǵymyzdy tanytatyn taǵdyrly kúnde ózgeniń de jaǵdaiyn oilaýdy esten shyǵarmaiyq degen Úndeýi osyndai sátte halqymyzdy biriktirip, birligimizdi arttyra tústi», - dedi Altai Kólginov.
