Omikron shtamymen aýyrý kóp jaǵdaida jeńil jáne simptomsyz ótedi. Bul týraly búgin Úkimet otyrysynda QR Densaýlyq saqtaý ministri Ajar Ǵiniiat aitty, dep habarlaidy QazAqparat.
«Búgin elimizde barlyǵy 21 myń infektsiialyq tósek-oryn ashyldy. Onyń 33 paiyzynda naýqastar jatyr. Reanimatsiialyq tósek-oryn - 2 myńnan astam, onyń 16 paiyzy bos emes. Rezervte 30 myń infektsiialyq jáne 3 myń reanimatsiialyq oryndar bar. Óńirler boiynsha statsionarlyq kómek uiymdastyrý máselesi turaqty baqylaýǵa alynǵan», - dedi ministr.
Onyń atap ótýinshe, koronavirýstyń omikron shtamymen aýyrý kóp jaǵdaida jeńil jáne simptomsyz ótedi.
«Qysqa 2 kúndik juǵý kezeńimen sipattalady. Aýrýdyń eselep kóbeiýi de sodan. Aýrýdyń alǵashqy belgileri - tumaý men jedel respiratorlyq aýrýlardaǵy siiaqty «sýyq tiiý» kórinisi, iaǵni qyzý, álsizdik, bas aýrýy, jótel. Búgingi jaǵdai boiynsha aýrýlardyń 80 paiyzy, iaǵni 78 629 aýrý ambýlatoriialyq em alýda. Sońǵy aptada anyqtalǵan jaǵdailardyń ishinde aýrýhanaǵa jatqyzylǵan adamdardyń úles salmaǵy - 19,5 paiyz. Statsionarǵa aýrýdyń orta jáne aýyr dárejesimen aýyratyn patsientter túsip jatyr. Bul rette emdeýge jatqyzylǵan adamdardyń ishinde aýyr jáne óte aýyr patsientterdiń úlesi – 5 paiyz», - dedi Ajar Ǵiniiat.
