Koronavirýstyń jańa «omikron» shtamy janýarlar arasynda mýtatsiiaǵa ushyrap, odan keiin baryp adamdarǵa juqqan bolýy múmkin. Buǵan jańa shtamnyń erekshelikteri kýá. Mundai pikirdi DNKOM molekýlalyq-genetikalyq zertteýler ǵylymi ortalyǵynyń negizin qalaýshysy men bas direktory Andrei Isaev bildirdi, dep habarlaidy QazAqparat TASS agenttigine silteme jasap.
«Omikron» shtamyn birinshi bolyp taratqan naýqastyń immýn tapshylyǵy bar ekenin, sozylmaly AITV infektsiiasymen aýyratynyn bilemiz. Sonymen qatar naýqas kovidtyń sozylmaly túrimen aýyrǵan. COVID-19 onyń aǵzasynda mýtatsiialanǵan bolýy múmkin. Alaida meniń teoriiam kishkene basqasha. Biz iri mysyqtar, buǵy men qarakúzenniń ártúrli túrleri siiaqty sútqorektilerdiń koronavirýspen aýyratynyn bilemiz. Ońtústik Afrikada adamdar janýarlarmen tyǵyz bailanysta. COVID-19 iri sútqorektilerge ótip, olardyń aǵzasynda evoliýtsiiaǵa ushyraidy dep oilaimyn. Sebebi virýstyń túraralyq aýysýy kezinde aqýyzdar kombinatorikasynda ózgeshe aiyrmashylyqtar bolyp, genetikalyq túrlilik qalyptasady», - dedi Isaev.
Onyń oiynsha, atalǵan shtamm tabylǵan naýqas qate anyqtalǵan bolýy múmkin. «Ǵalymdar «nóldik naýqas» retinde immýn tapshylyǵy bar adamdy tirkegen, onyń burys anyqtalǵan bolýy múmkin. Naýqas jergilikti ańshy, ońtústik afrikalyq reindjer, savannaǵa ketetin, qoryqta jumys isteitin adamnan juqtyrǵan bolýy yqtimal», - dep túsindirdi ol.
