RF Omby qalasynda etnikalyq qazaqtardyń basyn qosqan biznes-forým ótti. Atalǵan shara shet elde turatyn etnikalyq qazaqtar jáne sol elge qonys aýdarǵan otandastarmen bailanys ornatý jóninde Tuńǵysh Prezident – Elbasy bergen tapsyrmany júzege asyrý maqsatynda qurylǵan «Otandastar qory» baǵdarlamasynyń bir bóligi, dep habarlaidy "Ult aqparat".
Basqosýda «Otandastar qory» birinshi vitse-prezidenti Talǵat Adýov forýmǵa qatysýshylardy qor qurylymy men mehanizmderi týraly aityp berdi. Ásirese álemdegi qazaq diasporasyn biriktiretin quramyna «Atameken» iskerlik úiin men «Abai» mádeni úii kiretin «Qazaq House» mádeni- iskerlik úii jobasyna erekshe nazar aýdardy. T.Adýov «Qazaq House»-tyń negizgi tujyrymymen, onyń qyzmet baǵytymen jan-jaqty tanystyrdy.
Budan bólek, «Atameken» iskerlik úii qyzmeti túsindirilip, onyń shet eldegi kásipker qandastarǵa usynatyn múmkindikteri týraly áńgime órbidi. Forýmǵa qatysýshylar «Atameken» iskerlik úiine qatysty qyzyǵýshylyq bildirip, onyń damýyna qatysty óz usynystary bolatynyn atap ótti.
Qatysýshylar tarapynan sóz alǵan Omby qazaqtary qaýymdastyǵynyń ókili Alina Smykova etnikalyq belgisi qoiylǵan ónim shyǵaratyn sheberhana uiymdastyryp, ony Resei óńirlerine taratý múmkindigin qarastyrý jaily áńgimeledi. Al Rinat Tókenov memleket-jekeshelik seriktestigi boiynsha ulttyq nyshanda balabaqsha ashýdy, ondai mekemeniń qazir óte qajet ekeni týraly aitty. Serik Rahymov bolsa Reseiden Qazaqstanǵa astyq pen qiyrshyq tas jetkizýdegi qiyndyqtar jaily aityp, qor ókilderiniń osy máseleniń sheshilýine kómektesýin surady.
Biznes forýmǵa qatysýshylar jiyn sońynda Omby óńiri qazaqtarynyń oblysta «Abai» mádeni úiiniń qurylýyna qoldaý kórsetýge, «Otandastar» qory uiymdastyratyn is-sharalar men jobalarǵa qatysýǵa jáne biznes yntymaqtastyqqa qatysty óz usynystaryn ázirleýge yqylas bildirdi.
