Kiev pen Máskeý Resei túrmesinde qalǵan 113 Ýkraina azamatyn bostandyqqa shyǵarý máselesin talqylap jatyr, - dep habarlady Ýkraina ombýdsmeni Liýdmila Denisova.
10 qyrkúiekte ýkrainalyq arnalarǵa bergen suhbatynda Denisova 113 azamattyń (89 Qyrym tatary) qashan bostandyqqa shyǵatynyn naqty aita almaitynyn, biraq "jyl sońyna deiin shyǵaryp qalar" dep, úmiti baryn jetkizdi.
Resei men Ýkraina 7 qyrkúiekte bir-birine 35 tutqyndy (jalpy sany 70) tapsyrǵan. Keibir batys sarapshylary bul almasý Kiev pen Máskeý arasyndaǵy salqyn qarym-qatynasty qalpyna keltirer dep úmittenedi.
Kievke oralǵan 35 Ýkraina azamatynyń arasynda Qyrym tatar belsendisi Edem Bekirov ta boldy. Onyń zańgeri Nikolai Polozovtyń aitýynsha, Bekirovtyń densaýlyǵy qatty nasharlaǵandyqtan ony bosatqan.
Ýkraina prezidenti Vladimir Zelenskii 7 qyrkúiekte Azattyqtyń Ýkrain qyzmetine bergen suhbatynda Reseide qamaýda qalǵan ýkrainalyqtar tutqyndar almasýdyń kelesi kezeńinde elge oralatynyn aitty.
“Bul jerde másele bir nemese eki, úsh jyl týraly bolyp otyrǵan joq. Olardy múmkindiginshe elge tezirek qaitarýǵa kúsh salamyz” dedi Zelenskii.
