كيەۆ پەن مەسكەۋ رەسەي تٷرمەسٸندە قالعان 113 ۋكراينا ازاماتىن بوستاندىققا شىعارۋ مەسەلەسٸن تالقىلاپ جاتىر, - دەپ حابارلادى ۋكراينا ومبۋدسمەنٸ ليۋدميلا دەنيسوۆا.
10 قىركٷيەكتە ۋكراينالىق ارنالارعا بەرگەن سۇحباتىندا دەنيسوۆا 113 ازاماتتىڭ (89 قىرىم تاتارى) قاشان بوستاندىققا شىعاتىنىن ناقتى ايتا المايتىنىن, بٸراق "جىل سوڭىنا دەيٸن شىعارىپ قالار" دەپ, ٷمٸتٸ بارىن جەتكٸزدٸ.
رەسەي مەن ۋكراينا 7 قىركٷيەكتە بٸر-بٸرٸنە 35 تۇتقىندى (جالپى سانى 70) تاپسىرعان. كەيبٸر باتىس ساراپشىلارى بۇل الماسۋ كيەۆ پەن مەسكەۋ اراسىنداعى سالقىن قارىم-قاتىناستى قالپىنا كەلتٸرەر دەپ ٷمٸتتەنەدٸ.
كيەۆكە ورالعان 35 ۋكراينا ازاماتىنىڭ اراسىندا قىرىم تاتار بەلسەندٸسٸ ەدەم بەكيروۆ تا بولدى. ونىڭ زاڭگەرٸ نيكولاي پولوزوۆتىڭ ايتۋىنشا, بەكيروۆتىڭ دەنساۋلىعى قاتتى ناشارلاعاندىقتان ونى بوساتقان.
ۋكراينا پرەزيدەنتٸ ۆلاديمير زەلەنسكيي 7 قىركٷيەكتە ازاتتىقتىڭ ۋكراين قىزمەتٸنە بەرگەن سۇحباتىندا رەسەيدە قاماۋدا قالعان ۋكراينالىقتار تۇتقىندار الماسۋدىڭ كەلەسٸ كەزەڭٸندە ەلگە ورالاتىنىن ايتتى.
“بۇل جەردە مەسەلە بٸر نەمەسە ەكٸ, ٷش جىل تۋرالى بولىپ وتىرعان جوق. ولاردى مٷمكٸندٸگٸنشە ەلگە تەزٸرەك قايتارۋعا كٷش سالامىز” دەدٸ زەلەنسكيي.
