2020 jyly agroónerkásip keshenin qarjylandyrý kólemi 366 mlrd teńgege jetti. Bul týraly halyqqa esep berý kezdesýinde QR Aýyl sharýashylyǵy ministri Saparhan Omarov aitty, dep habarlaidy QazAqparat.
«Ótken jyl elimizdiń búkil ekonomikasy úshin jáne agroónerkásiptik keshen úshin kúrdeli jyl boldy. Sońǵy jyldary memleket tańdaǵan agrarlyq saiasat, sondai-aq ótken jyly qabyldanǵan daǵdarysqa qarsy sharalar koronavirýs pandemiiasymen bailanysty kúrdeli jaǵdailarda otandyq agroónerkásip kesheniniń turaqty damýyn qamtamasyz etýge múmkindik berdi. Ótken jyly qabyldanǵan daǵdarysqa qarsy sharalardy eskere otyryp, memlekettik qoldaý kólemi 366 mlrd teńgege deiin jetkizildi. Bul 2019 jylǵy deńgeiden 13 paiyzǵa kóp», - dedi ministr.
Saharhan Omarov sýbsidiialaý barynsha jeńildetilgenin jáne tolyq avtomattandyrylǵanyn, bul sýbsidiia berý protsesiniń ashyqtyǵyn qamtamasyz etýge múmkindik bergendishin atap ótti.
«Sýbsidiialaýǵa qoiylatyn talaptarǵa ózgerister engizý arqyly shaǵyn jáne orta fermerlerdi sýbsidiialaýmen qamtý kólemi ulǵaityldy. Ósimdik sharýashylyǵyndaǵy barlyq sýbsidiialar biryńǵai qaǵidalarǵa biriktirildi. Ósimdikterdi qorǵaý quraldaryn sýbsidiialaý keńeitildi. Endi gerbitsidter ǵana emes, pestitsidterdiń basqa da túrleri sýbsidiialanady. Basty jańalyqtardyń biri sýbsidiialardy kúntizbelik jyl sheńberinde emes, tuqym, tyńaitqysh, pestitsidter satyp alynǵan kúnnen bastap 12 ai ishinde alýǵa múmkindik jasaldy», - dedi ol.
