Aýyl sharýashylyǵy ministri Saparhan Omarov Premer-Ministr Asqar Maminniń tóraǵalyǵymen ótken Úkimet otyrysynda 2020 jylǵy qańtar-mamyrdaǵy elimizdiń aýyl sharýashylyǵy damýynyń qorytyndylary týraly baiandady, dep habarlaidy "Ult aqparat" primeminister.kz saityna silteme jasap.
Biylǵy 5 aidyń qorytyndysy boiynsha aýyl sharýashylyǵy jalpy óniminiń kólemi 2,2%-ǵa ulǵaiyp, 934,4 mlrd teńgeni qurady.
«Bul ósim mal sharýashylyǵyndaǵy ónim kóleminiń 2,3%-ǵa, onyń ishinde soiys salmaqtaǵy ettiń 3,5%-ǵa, súttiń 3,2%-ǵa ulǵaiýy esebinen qamtamasyz etildi. Oblystar kesindisinde Jambyl, Qaraǵandy, Aqmola, Batys Qazaqstan, Aqtóbe, Soltústik Qazaqstan, Almaty jáne Túrkistan oblystary respýblikalyq tempten joǵary boldy», — dep málimdedi ministr.
Sondai-aq iri qara mal sanynyń 4,1%-ǵa, qoidyń 2,8%-ǵa, jylqynyń 7,9%-ǵa, túieniń 4,4%-ǵa jáne shoshqanyń 1,5%-ǵa óskeni baiqalady. Ósimdik sharýashylyǵynda 2020 jylǵy kóktemgi dala jáne egis jumystaryn der kezinde júrgizý úshin barlyq qajetti shara qabyldandy, búgingi kúni egis jumystary tolyǵymen aiaqtaldy.
Oblystar ákimdikteriniń jedel aqparaty boiynsha egis alańdary 237,7 myń gektarǵa artyp, 22,5 mln gektardy qurady.
Nátijesinde azyqtyq daqyldarǵa arnalǵan alańdar 312,1 myń gektarǵa, maily daqyldar alańdary 184,7 myń gektarǵa, baqsha daqyldaryna arnalǵan alańdar 7,4 myń gektarǵa, kókónis alańdary 3,9 myń gektarǵa, kartop alańdary 2,5 myń gektarǵa ulǵaidy.
«Sapaly jáne ýaqtyly júrgizilgen ylǵaldylyqty saqtaý sharalary jáne egis aldynda júrgizilgen topyraqty óńdeý aramshópterdi barynsha joiýǵa jáne topyraqtyń ylǵaldylyǵyn saqtaýǵa yqpal etti. Egis jumystary ońtaily merzimderde júzege asyryldy, nátijesinde egin birkelki jáne tolyǵymen shyqty. Fermerler der kezinde jeńildetilgen janarmaimen, sapaly tuqymdarmen, tyńaitqyshtarmen, tehnikamen qamtamasyz etildi», — dedi S. Omarov.
Kelesi mańyzdy is-shara — egisti fitosanitariialyq qorǵaý. Ósimdikterdi qorǵaý quraldaryn satyp alýǵa yntalandyrý úshin aǵymdaǵy jyly 37 mlrd teńge kózdelgen, bul 16,6 mln litr pestitsid sýbsidiialaýǵa múmkindik beredi.
«Qazgidromettiń boljamyna sáikes maýsym aiyndaǵy aýanyń ortasha temperatýrasy Soltústik Qazaqstan oblysynda, Qostanai, Aqmola, Pavlodar oblystarynyń soltústik bóliginde normada bolady, Aqmola oblysynyń orta jáne ońtústik bólikterinde, Qaraǵandy, Shyǵys Qazaqstan oblystarynyń kóp jerinde, sondai-aq Pavlodar jáne Qostanai oblystarynyń ońtústiginde normadan 1°S-qa joǵary bolady», — dep atap ótti aýyl sharýashylyǵy ministri.
Joǵaryda kórsetilgen oblystarda jaýyn-shashyn mólsheri normada bolady, Qaraǵandy oblysynda ǵana normadan tómen bolady dep boljanýda. Bul faktorlardyń barlyǵy qolaily aýa-raiy jaǵdaiynda jáne egin jinaý jumystaryn ońtaily merzimderde júrgizgen jaǵdaida jaqsy túsim alýdy boljaýǵa múmkindik beredi.
Kórsetilgen kezeńde tamaq ónimderi óndirisi 2,3%-ǵa ósip, 743,3 mlrd teńgeni qurady. Bul rette, shujyq ónimderi óndirisiniń 20,5%-ǵa, makaronnyń 16,1%-ǵa, sary maidyń 14,7%-ǵa, jarmanyń 13,5%-ǵa, unnyń 6,6%-ǵa, ósimdik maiynyń 5,3%-ǵa, qyshqyl sút ónimderiniń 4,8%-ǵa, syr men irimshiktiń 4,7%-ǵa óskeni baiqalady.
Aýyl sharýashylyǵynyń negizgi kapitalyna salynǵan investitsiialar 14,3%-ǵa ulǵaiyp, 145,1 mlrd teńgeni, tamaq ónimderi óndirisi 18,8%-ǵa artyp, 28,5 mlrd teńgeni qurady.
5 aidyń qorytyndysy boiynsha oń dinamika baiqalady. Bul rette salany damytý úshin Úkimet josparlanǵan nátijelerge qol jetkizýge múmkindik beretin qajetti sharalardy qabyldady.
