Astana qalasynyń Ishki ister departamentinde 26 jastaǵy Eskendir Súleimenov mert bolǵan jol apatyna qatysty pikir bildirdi, - dep habarlaidy "Ult aqparat".
«Belgili bolǵandai, 1989 jylǵy júrgizýshi Muhitova Hyundai avtokóligimen Máńgilik el kóshesinde kele jatqan. Sol jaqqa burylý kezinde QR jol erejesiniń 13,5 pýnktin buza otyryp, 1991 jylǵy júrgizýshi Súleimenov aidap kele jatqan Ducatti Streetfighter markaly mototsiklmen soqtyǵysqan. Dene jaraqatynan Eskendir Súleimenov kóz jumdy. Ólimge ákep soqqan atalǵan jol-kólik oqiǵasy sotqa deiingi tergeý amaldarynyń biryńǵai reestrine tirkeldi. Oljas Súleimenovtiń nemeresin qaǵyp ketken qyzdyń ákesi Qyzylorda oblystyq IID basshysy bolyp jumys isteidi: Muhitov Qairat Bolatuly. Qyzdyń ata-anasy tarapynan bul iske eshqandai kedergi keltirilip jatqan joq», - dedi baspasóz máslihatynda departament bastyǵynyń orynbasary Sanjar Ádilov.
Esil aýdandyq №2 sotynyń Muhitovaǵa qatysty bultartpaý sharasy retinde kepildik berý týraly sheshimniń qabyldaǵany aitylady. Kepildiń somasy - 600 205 teńge. Prokýratýra ókilderi kepil týraly ótinishti qoldady.
Júrgizýshi Muhitova jol apatynan keiin oqiǵa ornynda bolǵan.
«Barlyq bastapqy tergeý amaldary onyń qatysýymen ótti. Júrgizýshige qatysy alkogolge jáne esirtkige meditsinalyq kýálandyrý júrgizildi. Kýálandyrý qorytyndysy esirtkilik, alkogoldik nemese psihotroptyq zattardyń tabylmaǵanyn kórsetti. Olardyń bári is materialdarynda bekitildi. Dál sol kúni biz Muhitovadan kúdikti retinde jaýap aldyq. Onymen birge, qylmystyq is boiynsha tergeý bastalǵannan keiin-aq jedel-járdem kóliginiń qyzmetkerlerinen, kórgen kýágerlerden jáne oqiǵa ornyna birinshi bolyp jetken politsiia qyzmetkerlerinen jaýap alyndy», - deidi ol.
Eske salaiyq, Oljas Súleimenovtiń nemeresi Eskendirdiń qaza tapqan jol apaty Astanada 22 maýsymda Máńgilik el men Kerei, Jánibek handar dańǵylynyń qiylysynda bolǵan edi. Keiin politsiia tergeý jumystary jaily aityp bergen.
