Kórnekti aqyn, qoǵam qairatkeri Oljas Súleimenov saiasi partiia qurady. Bul týraly «Baitaq bolashaq» ekologiialyq aliansynyń tóraǵasy Azamathan Ámirtai habarlady.
Forbes.kz basylymynyń jazýynsha, 18 naýryz kúni Almatyda ótetin konferentsiiada «Jasyl álem» («Zelionyi mir») atty ekologiialyq partiianyń qurylatyny jóninde resmi túrde habarlanady. Dál sol kúni jýrnalistermen bolatyn kezdesýde partiianyń uiymdastyrý komitetin qurý máselesi qaralyp, onyń músheleri anyqtalmaq.
Azamathan Ámirtaidyń aitýynsha, partiiany qurý bastamasyn kórnekti aqyn, jazýshy, qoǵamdyq-saiasi qairatker Oljas Súleimenov kótergen. Qazirgi tańda «Jasyl álem» partiiasynyń strategiiasy men maqsaty, jarǵysy tolyq daiyndalǵan.
- 18 naýryz kúni biz uiymdastyrý komitetiniń tizimin bekitip, partiiany qurý týraly ótinishti QR Ádilet ministrligine joldaimyz. Odan keiin ministrlik barlyq qujattardy tekserip, kelisimin bergennen keiin, bizdiń 40 myń qol jinaýǵa jáne alǵashqy sezd ótkizýge ýaqytymyz bolady. Qol jinaý - bizdiń ekologiialyq birlestik úshin asa qatty másele emes, sebebi bizdiń belsendilerimiz ben filialdarymyzdyń burynnan ber ekeni kópke aian, - deidi «Baitaq bolashaq» ekologiialyq aliansynyń tóraǵasy.
Azamathan Ámirtaidyń málimetinshe, bastamashy top qazirdiń ózinde alǵashqy myń adamdy qatarǵa qosyp úlgergen. Ekologiialyq partiianyń Tóraǵasy Oljas Súleimenovtyń ózi bolmaq.
- «Baitaq bolashaq» ekologiialyq aliansy» respýblikalyq qoǵamdyq birlestigi 3 jyldan beri eldegi ekologiialyq problemalarmen ainalysyp júr. Uiymdy Oljas aǵa Súleimenov qurdy. Biz qoǵamdyq bastamalarda ekologiialyq suraqtardy sheshemiz dep oiladyq. Biraq, bir túsingenimiz, bári ońai emes eken. Istiń bulai rettelmeitinin uqqan soń strategiiany ózgertip, jańa kezeńge aiaq basýymyz kerek dep kelistik. Bizdiń maqsatymyz - 2021 jylǵa qarai parlamenttik sailaýǵa jáne maslihat sailaýyna qatysý. Parlamentte ekologiia máselelerin kótere alatyndai dárejege ie bolý úshin 10% paiyz daýys jetkilikti dep oilaimyz. Búginde memleketimiz ekologiialyq apattarmen kúresý úshin jyl saiyn qomaqty qarajat bólip jatyr. Degenmen olardy sheshý tetikteri joq. Is durys jolǵa qoiylmaǵandyqtan anyq nátije kórip otqan joqpyz. Sol sebepti biz, ekologtar retinde osyndai aýqymdy dúnielerdi rettep otyrý úshin parlament pen maslihattardyń barlyq satysynda bolýymyz qajet, - deidi Azamathan Ámirtai.
Partiia josparynda jańa ekologiialyq kodeksti daiyndap, zańnamalardy jańartý jumystary bar.
- Biz ekologiialyq mádeniet máselelerimen ainalysqymyz keledi. El azamattarynyń boiyna ekologiialyq mádeniet uǵymyn sińirip, olarǵa tabiǵatqa asqan uqyptylyqpen kóńil bólip, ekonomika men ekologiia arasyndaǵy balansty saqtaýdy úiretýimiz kerek. Bul - bizdiń negizgi maqsatymyz. Óitkeni shyn janymyz ashidy. Qazaqstanda ártúrli deńgeidegi problemalar jetkilikti. Solardy qadaǵalaýymyz qajet, - deidi ol.
Aita keteiik, elimizde resmi túrde 6 saiasi partiia tirkelgen. Olar: Nur Otan, «Birlik» partiiasy, «Qazaqstannyń «AQ JOL» Demokratiialyq partiiasy», «Aýyl» sotsial-demokratiialyq partiiasy, Qazaqstan kommýnistik halyq partiiasy jáne Jalpy ulttyq sotsial-demokratiialyq partiia.
2016 jylǵy Qazaqstan Respýblikasy Parlamenti Májilisi depýtattarynyń kezekten tys sailaýynyń qorytyndysy boiynsha ókilettik bylai bólindi: Nur Otan - 84; Qazaqstan kommýnistik halyq partiiasy - 7; «Aq jol» - 7.
Saiasi partiialar májiliste múshelikke ie bolý úshin 7% paiyzdyq mejeden ótýi tiis.
Aita ketsek, Oljas Omaruly Súleimenov 1936 jyly 18 mamyrda Almaty qalasynda dúniege kelgen. Qazaqstannyń Halyq jazýshysy, lingvist-zertteýshi, túrkolog, tanymal saiasatshy, kórnekti memleket jáne qoǵam qairatkeri. Qazaqstan Respýblikasy Joǵarǵy Keńesiniń 10-shy jáne 13-shi shaqyrylymdarynyń depýtaty, SSRO Joǵarǵy Keńesiniń 11-shi shaqyrylymynyń depýtaty, SSRO Halyq depýtaty (1989-1991). Oljas Súleimenov 1-shi dárejeli «Barys», Oktiabr Revoliýtsiiasy, Eńbek Qyzyl Tý ordenderimen, «Dańq belgisi», medaldermen marapattaǵan. Ol QazSSR Memlekettik syilyǵynyń jáne Qazaqstannyń Lenindik komsomol syilyǵynyń laýreaty, «Tarlan» syilyǵynyń laýreaty.
1989 j. aqpanynda halqaralyq Nevada-Cemei iadrolyq qarýǵa qarsy qozǵalysynyń prezidenti boldy.
1991 j. qazanynan Qazaqstan Halyq kongressi partiiasynyń tóraǵasy, qurmetti tóraǵasy boldy.
1994 j. sáýirde shaqyrylǵan QR Joǵarǵy keńesi tóraǵalyǵyna usynylady, májiliste óz úmitkerligin talappen alyp tastaidy.
1994—95 jj. QR Joǵarǵy keńesiniń Qorshaǵan orta jáne tabiǵatty paidalaný komitetiniń múshesi.
1995 j. tamyzynan bastap QR Italiia respýblikasyndaǵy, 1996 j. sáýirinen Grekiia respýblikasyndaǵy, sondai-aq Malta respýblikasyndaǵy tótenshe jáne ókiletti elshi mindetin atqardy.
Ult portaly
