Jazýshy Oljas Súleimenov ekinshi márte jieniniń ólimine sebepker bolǵan jol-kólik oqiǵasy boiynsha sottalýshy Malika Muhitovany bas bostandyǵynan aiyrmaýdy surady, dep habarlaidy QazAqparat tilshisi.
Sýdia Ásem Ramazanova kópshilikke jazýshynyń hatyn oqyp berdi.
«2019 jyldyń 10 qańtarynda Astana qalasynyń sotyna hat kelip tústi. «Eskendir bala kezinen kóz aldymda ósti. 1995 jyly men Italiiada elshi boldym da, ol bastaýysh mektepke bardy. Sodan keiin 2001-2013 jyldary Parijge jumysqa aýystym. Eskendir orta mektep pen ýniversitetti sol elde aiaqtady. Onyń ata-anasy erterekte ajyrasyp ketken, sondyqtan osy jyldar boiy ol ulym sekildi bizben birge turdy. Advokat Kýriachenko Parijdegi oqý oryndaryna suraý jiberip, zertteý barysynda Eskendirdiń ol jaqta eshqashan aiypqa tartylmaǵany týraly jaýap aldy. Eskendir 26 jyl boiy bir staqan alkogol ishpegen, temeki shekpegen. Stýdent retinde Frantsiiada kólik pen mototsikl júrgizý quqyǵyna ie boldy. Eýropada bir de bir aiyppulsyz jáne túsiniksiz birneshe jyldan bergi kólik júrgizý tájiribesi bar», - dedi sýdia Ásem Ramazanova.
Jazýshy keleshekte qyzy ákesiniń ustanymyn túsinetinine senim bildirdi.
«Eskendirdiń ata-anasy men ájesiniń jaǵdaiyn menen artyq eshkim túsinbeidi. Qabyrǵany qaiystyratyn aýyr qaza kezinde adamdar dinnen jubanysh tabady. Quran men Bibliia raqymshyldyq pen keshirimge shaqyrady. Men otbasynyń úlkeni retinde Astana qalasynyń sotyna Muhitovany nemqurailyǵy úshin aiyptap, biraq bas bostandyǵynan aiyrmaý týraly ótinish jiberdim, búgin osy ótinishimdi taǵy jiberip otyrmyn. Zaiybym meni qoldady. Qyzym Leila men basqa týystarym eń aýyr jaǵdailarda adamdy keshirimdilik qutqaratynyn túsiner degen senimdemin. Leila eki qyzyn ósirip jetkizip, óz jan dúniesiniń tynyshtyǵyn qalpyna keltirýi kerek», - dep jazǵan O.Súleimenov.
Aita ketsek, budan buryn da O.Súleimenov Muhitovany bas bostandyǵynan aiyrmaýdy suraǵan bolatyn.
Eske sala ketsek, ótken jyldyń qarasha aiynda Oljas Súleimenovtiń 26 jastaǵy jieni Eskendir Súleimenovtiń kóz jumýyna sebepker bolǵan jol-kólik oqiǵasyna qatysty sot isine núkte qoiylǵan bolatyn.
«Sot Malika Muhitovany QR Qylmystyq kodeksiniń 345-baby 3-bóligi boiynsha kináli dep taýyp, qaýipsizdigi minimaldy túzetý mekemesinde eki jylǵa bas bostandyǵynan aiyrý týraly, 5 jylǵa kólik júrgizý quqyǵynan aiyrý týraly úkim shyǵarady», - dep iske qatysty úkim shyǵarǵan edi sýdia Qanat Tobaǵaliuly.
2018 jyldyń maýsym aiynda Astanadaǵy jol apatynda Oljas Súleimenovtiń 26 jastaǵy jieni Eskendir Súleimenov mert bolǵan edi. Eskendir tizgindegen mototsikl qiylysqa shyqqan kólikke soǵylǵan. Arada kóp ótpei Astana qalalyq Ishki ister departamenti apatqa sebepker bolýy múmkin Hyundai avtokóliginiń iesi, 29 jastaǵy astanalyq kelinshekke qatysty tergeý amaldary júrip jatqanyn habarlady. Ótken jyldyń 12 qazanynda Oljas Súleimenovtiń jieniniń ólimine qatysty sot protsesi bastalyp, Eskendir Súleimenov qaza tapqan jol apaty boiynsha sottalýshy Malika Muhitova marqumnyń ata-anasynan keshirim suraǵan bolatyn.
