«OLX jetkizý» qyzmetiniń atyn jamylǵan alaiaqtar jarnama saittarynda áli de «óz qyzmetin» usynyp keledi, dep habarlaidy "Ult aqparat" Nur-Sultan qalasynyń politsiia departamentiniń baspasóz qyzmetine silteme jasap.
Taýardy satý týraly habarlandyrýdy ornalastyrǵannan keiin alaiaqtar satyp alýshy bolyp bailanysqa shyǵady, nómirlerdi bir kún ǵana paidalanyp, artynsha óshirip tastaidy.
Hat almasý barysynda alaiaqtar basqa qalada ekenin túsindirip, «jetkizý» qyzmetin paidalanýdy usynady. Iaǵni, kartadan tólem jasalǵannan keiin kýrer satýshydan kelip zatyn alady.
Ol úshin alaiaqtar jalǵan siltemeni jiberedi. Bir qaraǵanda, silteme eshqandai kúdik týdyrmaidy, biraq basqan kezde paidalanýshyny fishingtik saitqa jiberedi. Bul saitta bank kartasy, CVV-kody, JSN kórsetilgen saýalnamany toltyrý, ótinimdi jiberý jáne aqsha aýdarymyn kútý usynylady.
Satýshy ótinimdi jibergennen keiin, kórsetken barlyq derekter fishingtik sait arqyly alaiaqtardyń qolyna túsedi. Budan ári, olar internet-bankingtiń eseptik jazbasyna kiredi, aqshaǵa tolyq qol jetkizedi jáne qolda bar aqshany kart-shottardan lezde urlaidy. Al alaiaqtyq sait birneshe sekýndtan keiin buǵattalady da joq bolady.
Jyl basynan beri atalǵan alaiaqtyq shemasynan júzden astam astanalyq zardap shekti. Shyǵyn shamamen 2 mln teńgeni qurady. Barlyǵy boiynsha qylmystyq is qozǵaldy.
Nur-Sultan qalasynyń politsiia departamenti azamattarǵa bank kartalarynyń derektemeleri men jeke derekterin bermeý týraly eskertedi. Saittyń siltemesi men túpnusqalyǵyna nazar aýdarý qajet. Fishingtik saittardyń ataýynda qosymsha hat nemese belgi bolady. Ádette alaiaqtar taýardy ony kórip, teksermei-aq satyp alýǵa kelisedi.
