Qazaqstan olimpiadalyq komandasynyń negizgi bóligi Japoniiaǵa ushyp ketti, dep habarlaidy "Ult aqparat".
Tokioǵa «Aqbulaq» olimpiadalyq bazasynan karateshiler, sadaq atýshylar, ústel tennisi men semserlesý komandasy, aýyr atletter men boksshylar attandy. Ózge de jattyǵý bazalarynan júzý sportynyń, sý doby sportynyń ókilderi, jeńil atletter, veloshabandozdar, stend atý men nysana kózdeýden qurama komandalar, sondai-aq dziýdoshylar da Tokioǵa jol tartty.
«Atletter eki aptalyq karantinde bolyp, sońǵy jattyǵý jiyndaryn Almaty qalasy men Almaty oblysynda ótkizdi. Oiyn qarsańyndaǵy sońǵy kúnderdi sportshylar oqshaýlaný rejiminde ótkizip, syrtqy álemmen bailanysqa túsken joq», - delingen habarlamada.
«Biz Olimpiada oiyndaryna qatysýshy sportshylardyń qaýipsizdigine baǵyttalǵan HOK pen Tokio-2020 uiymdastyrý komitetiniń barlyq talaptaryn oryndadyq. Ulttyq olimpiadalyq komitet pen ulttyq federatsiialar sportshylardyń sapaly ári qaýipsiz daiyndalýyna bar jaǵdaidy jasady. Bizdiń komandadaǵy 96 sportshy ortaq eńbegimizdiń jemisi. Sportshylar men bapkerlerge, sondai-aq, sporttyq dárigerlerge birlesken jumysy úshin rahmet aitamyz», - delingen Ulttyq olimpiadalyq komitettiń jazbasynda.
Delegatsiianyń alǵashqy bóligi charterlik reispen Almatydan Tokioǵa ushyp ketti. Osy oraida, barlyq qaýipsizdik sharalary saqtalǵan. Delegatsiianyń aeroport jáne áýekompaniia qyzmetkerlerimen bailanysqa meiilinshe az túsýi qadaǵalanýda. Aviatsiialyq qyzmetkerlerdiń barlyǵy da eki márte PTR synaqtan ótti.
28 shildege josparlanǵan ekinshi reispen Japoniiaǵa 43 adam jol tartady. Olardyń qatarynda balýandar, kórkem gimnastikadan Qazaqstan komandasy, ártistik júzý, bessaiys jáne jeńil atletterdiń bir bóligi bar.
Jattyǵý kezinde arnaiy sporttyq bazalardy qajet etken sportshylardyń shamamen úshten bir bóligi karantin men daiyndyqtyń aqyrǵy kezeńin shetelde ótkizdi. Olar tikelei Tokiony betke alady.
8 shildeden bastap Japoniiada Olimpiada oiyndaryndaǵy Qazaqstan Missiiasy jumysyn bastady. Qazaqstan elshiligi men SIM qoldaýy arqyly sportshylarmen kezdesýge qajetti zattar men jattyǵýǵa kerekti qosymsha qurylǵylardyń barlyǵy da daiyndaldy.
Olimpiada aýylyndaǵy tirshilik te karantin talaptaryna sai bolmaq. Túrli el komandalarynyń, ártúrli sport túrlerindegi atletterdiń ózara bailansýyna tyiym salynǵan. Olimpiadalyq aýyl men jattyǵý jáne sport zaldarynyń arasyndaǵy marshrýttan aýytqýǵa bolmaidy, qoǵamdyq kólikti paidalanýǵa ruqsat joq. Koronavirýsqa bailanysty kún saiyn test tapsyrý mindetti sanalady. Sonymen qatar, sportshylardyń júrgen orny men densaýlyq jaǵdaiyn baqylaityn birneshe qosymshalardy uialy telefonǵa ornatý mindetteledi.
Qazaqstan olimpiadalyq komandasynyń sapynda 97 litsenziia jeńip alǵan 96 sportshy bar.
Olimpiada oiyndarynyń ashylý saltanaty 23 shilde kúni Nur-Sultan ýaqytymen 17:00-de Tokio stadionynda bastalady.
