Búgin Aqtóbe oblysynyń ákimi Ońdasyn Orazalin Tokio Olimpiadasyna joldama alǵan Meirambek Ainaǵulov pen Nurislam Sanaevty qabyldady, dep habarlaidy "Ult aqparat" aimaq basshysynyń baspasóz qyzmetine silteme jasap.
Kezdesýge oblystyq Dene shynyqtyrý jáne sport basqarmasy basshysynyń mindetin atqarýshy Nurbol Sydyqov jáne grek-rim kúresinen QR eńbek sińirgen bapkerler Raqymjan Baqytjanov pen Baýyrjan Nurmahanov, «Er baqyt» áskeri-patriottyq klýbynyń tóraǵasy, aýǵan soǵysynyń ardageri Marat Qoilybaev qatysty.
Óńir basshysy balýandardy jeńisterimen quttyqtap, alǵysyn bildirdi. «Erkin jáne grek-rim kúresinen Aqtóbe óńiriniń sportshylary respýblikada aldyńǵy qatardan kórinip júr. Halqymyzda "baq shaba ma, bap shaba ma" degen jaqsy sóz bar. Sport - rýh pen namystyń birdei kórinetin eń úzdik salasy. Osyndai batyr balýandarymyzdy daiarlap júrgen bapkerlerdiń jumysyna úlken rizashylyǵymdy bildiremin. Jinaǵan mol tájiribe men biliktiń arqasynda osyndai dárejege jettik. Etken eńbek, tókken ter aqtalyp, búgin mine, úlken dodaǵa joldama alyp kelip otyrsyzdar. Osy arqyly sizder Aqtóbe óńiriniń ǵana emes, el maqtanyshy, keiingi jas býynǵa úlgisizder. Namysty qoldan bermei týǵan jerdiń atyn shyǵarǵandaryńyz úshin alǵys bildiremin», - dedi oblys ákimi. N.Orazalin sportshylardyń jattyǵýlaryna barlyq jaǵdai jasalatynyn atap ótti.
«Eshteńege alańdamai, jattyǵyp, aldaǵy jyly Tokio qalasynda ótetin Olimpiada oiyndarynda elimizdiń namysyn abyroimen qorǵaidy dep senemin», - dedi.
Kezdesý sońynda aimaq basshysy qos sportshy men olardyń jattyqtyrýshylaryna alǵysyn bildirip, aqshalai sertifikattar tabystady.
