Tokio Olimpiadasyna Qazaqstannan 95 sportshy qatysady. Ulttyq Olimpiada komiteti bul san 5 shildeden keiin artýy múmkin ekendigin aitýda, dep habarlaidy "Ult aqparat".
Qazaqstan birinshi ret Olimpiada baǵdarlamasyna jańadan engen sport túrleri, atap aitqanda, sporttyq quzǵa órmeleý jáne karate boiynsha qatysady. Karateden birden bes sportshy, erlerden Darhan Asadilov, Nurqanat Ájiqanov, Daniiar Iýldashev pen áielderden Móldir Jańbyrbai men Sofia Berýltseva, al quzǵa órmeleýden Rishat Haibýllin baq synaidy.
Tanymal qazaqstandyq jeńil atlet Olga Rypakova otandyq olimpiadalyq quramnyń kóshbasshysy bolatyny sózsiz. Bul doda Olganyń sport mansabyndaǵy tórtinshi Olimpiadasy bolmaq. Búginde onyń qorjynynda olimpiada medaldarynyń tolyq jiyntyǵy bar. Ol buǵan deiin qatysqan barlyq Olimpiadadan júldemen oralǵan bolatyn.
Sý dobynan erler quramasy komandalyq oiyn túrlerinen jarysqa qatysatyn qazaqstandyq jalǵyz qurama bolyp otyr. Olar Olimpiada oiyndaryna segiz jyldan keiingi úzilisten soń oraldy.
Dástúr boiynsha Qamshybek Qońqabaev bastaǵan bokstan erler komandasy tolyq qurammen, segiz salmaq boiynsha qatysady. El qorjynyndaǵy toǵyz joldama boksshylarǵa tiesili.
Gimnast Milad Karimi jalǵyz ózi jeti joldamany enshilep, irikteý kezeńin sátti aiaqtady.
Júzýden Qazaqstan úsh joldamany ielendi. Onyń ekeýin Olimpiada chempiony Dmitrii Balandin jeńip aldy.
Otandasymyz Rýslan Qurbanov Halyqaralyq semserlesý federatsiiasynyń jeke reitingi boiynsha qurlyqtyq kvotany jeńip alǵan alty sportyshynyń qataryna endi.
Afinydaǵy Olimpiada oiyndarynan keiin (2004) alǵash ret Qazaqstannyń úsh veloshabandozy toptyq jarysta baq synaidy. Mundai nátijege qol jetkizýge komanda kóshbasshysy Aleksei Lýtsenko úlken úles qosty. Ol Qazaqstanǵa jalpy alǵanda Aziia qurlyǵynyń birde-bir memleketi enshilemegen upaidy ákeldi. Trektegi velosport (sprint, omniým jáne keirin) boiynsha úsh litsenziia jeńip aldy. Aita keterligi, sporttyń bul túri boiynsha joldama Qazaqstan úshin tarihi bolyp esepteledi. Sebebi, osy ýaqytqa deiin qazaqstandyq sportshylar atalǵan distsiplina boiynsha Olimpiada oiyndaryna qatyspaǵan.
Sadaq atýdan 20 jyldan keiin alǵash ret Qazaqstannan úsh sadaqshy Olimpiada oiyndarynda komandalyq jarysqa qatysady.
Búginde on bir joldama balýandarǵa tiesili bolsa, jeńil atletter de osy mólsherde litsenziia jeńip aldy. Tennisshiler jeti, al baidarka men kanoede esýden alty joldama qorjynda. Reitingtik jarystar nátijesi boiynsha dziýdoshylar alty joldamany ielendi. Tokio tórinde beldesetin tatami sheberleriniń arasynda tájiribeli Eldos Smetov bar.
Ústel tennisinen Qazaqstan quramasynyń enshisinde qos joldama, sondai-aq, taekvondo men slalomdy esý boiynsha sportshylar eki litsenziia aldy.
Qazirgi tańda UOK keibir sport túrlerinen halyqaralyq federatsiialardyń litsenziialardy qaita bólý, úlestirý nátijelerin kútýde.
Olimpiada oiynaryna qatysatyn sportshylardyń sońǵy ári naqty tizimi 5 shildeden keiin belgili bolady.
«Qazaqstandyq delegatsiianyń basym bóligi eki aptalyq karantinnen keiin Qazaqstannan Tokioǵa attanady. Birinshi oryndaǵy mindetimiz sportshylardyń qaýipsizdigi», - dep atap ótti Ulttyq Olimpiada komitetinen.
Endi mańyzdy mindetterdiń biri Olimpiada oiyndary bastalar aldyndaǵy sońǵy kúnderdi uiymdastyrý jáne materialdyq-tehnikalyq jaǵynan qamtamasyz etý bolyp qala beredi. Tokio Olimpiadasynyń Uiymdastyrý komiteti men Halyqaralyq Olimpiada komiteti Olimpiadaǵa qatysýshylardyń densaýlyǵyna qaýip tóndirmeý jáne aldyn alý úshin buryn-sońdy bolmaǵan sharalardy júzege asyrdy. Atap aitqanda, qatysýshylarǵa arnaiy erejeler jiyntyǵyn «Pleibýkty» shyǵardy. Mundai sharaǵa sportshylardyń jáne delegatsiialardyń basqa músheleriniń qozǵalysyn shekteý, UOK-tan jáne halyqaralyq federatsiialardan delegatsiialardyń sanyn qysqartý, kúndelikti PTR-testileri jáne Olimpiada oiyndaryna qatysýshylardyń ornalasqan jerin arnaiy mobildi qosymshalar arqyly únemi qadaǵalaý kiredi. Komanda Japoniiaǵa 16 shildede «Air Astana» kompaniiasynyń qoldaýymen uiymdastyrylǵan charterlik reispen ushady.
Olimpiada oiyndarynyń ashylý saltanaty 23 maýsymda Tokio Olimpiada stadionynda ótedi.
