Halyqaralyq Olimpiada komiteti men túrli Ulttyq Olimpiadalyq komitet basshylarynyń keńeitilgen telekonferentsiiasy ótti. Tarihta alǵash ret ótkizilgen onlain jiynǵa Tomas Bah jetekshilik etti dep habarlaidy Olympic.kz.
Buǵan deiin HOK basshysy men UOK-ter jetekshileriniń qatysýymen aýqymdy onlain-konferentsiia ótkizilmegen. Alaida, COVID-19 indetinen saqtanyp, qaýiptiń aldyn alý úshin mundai tájiribe óte qajet. Onlain kezdesýge Qazaqstan atynan UOK prezidenti Timýr Qulybaev qatysty.
Jiynnyń basty taqyryby – 2020 jylǵy oiyn ýaqytynyń aýystyrylýyna bailanysty olimpiadaǵa irikteý týrnirlerin jáne olardyń ótý merzimin talqylaý.
«Aldymen barshańyzǵa sálem joldaimyn. 2020 jylǵy Olimpiada oiyndarynyń aýystyrylýy týraly sheshimdi oiynǵa qatysy bar barlyq adamnyń qaýipsizdigi úshin qabyldaǵanymyzdy atap ótkim keledi. Jahandy jyldam jailaǵan koronavirýs indeti álemdegi ahýaldy ýshyqtyra tústi. COVID-19 indeti kún saiyn qarqyp alyp keledi. Qazirgi tańda bar álem men árbir memlekette atalǵan virýsty juqtyrýshylar sany saǵat sanap ósýde.
Osy jaǵdaiǵa qatysty kún saiynǵy aqparatty qaraý da ońai bolǵan joq. Biz Olimpiada oiyndaryn keiinge shegerýden basqa amaldardyń barlyǵyn qarastyrdyq. Japon taraby oiyn kelesi jyldyń jazynan keshiktirilmei ótkizilse jáne Tokio-2020 ataýy qalsa ǵana kelisetinderin jetkizdi. Osy oraida, kúshine engen barlyq kelisimsharttar saqtalady. Biz árbir detaldi, árbir sátti esepke aldyq. Óitkeni, bul ǵalamdyq deńgeide qabyldanǵan sheshim. Osy oraida, bizdiń ómirimiz úshin kúresip jatqan barlyq dárigerlerge alǵys aitamyn», - dedi Tomas Bah.
Jiyn barysynda búginge deiin Olimpiadaǵa joldama alǵan sportshylardyń litsenziiasy saqtalatyny birinshi kezekte aityldy. Olarǵa qaitadan normativ oryndaý qajettiligi týyndamaidy. Al Tokio Olimpiadasyna beriletin qalǵan joldamalardy úlestiretin merzim men Olimpiada oiyndaryna irikteý týrniriniń jańa erejeleri aldaǵy úsh aptada anyqtalady. «Bul suraq boiynsha arnaiy top qurylady. Atalǵan top jarys kúntizbesin túzý úshin Federatsiialarmen tyǵyz jumys isteidi. Barlyq týrnirlerdiń ótkizilý merzimi esepke alynbaqshy. Litsenziia berý úderisindegi árbir detal tolyqqandy jáne sapaly túrde tekseriledi», - dedi Tomas Bah myrza.
Eske sala keteiik, 24 naýryz kúni Halyqaralyq Olimpiada komiteti men Japoniia Úkimeti birlese otyryp, málimdeme jasady. Olimpiada oiyndaryn aýystyrý týraly kelisimge Japoniia premer-ministri Sindzo Abe men HOK prezidenti Tomas Bah kelgen.
Búkilálemdik densaýlyq saqtaý uiymy usynǵan aqparattardy negizge ala otyryp, HOK pen Japoniia premer-ministri Tokio Olimpiadasyn 2021 jyldyń jazynan keshiktirmei ótkizý týraly sheshim qabyldady. Bul sportshylar men Olimpiadaǵa qatysty bar barlyq adamnyń densaýlyǵyn saqtaý úshin jasalǵan.
