Búgin Iordaniianyń Amman qalasynda ótip jatqan bokstan Olimpiadaǵa irikteý týrnirinde Abylaihan Júsipov alǵashqy jekpe-jeginde jeńiske jetti, dep habarlaidy "Ult aqparat".
Álemde «qazaqtyń» salmaǵy atynyp ketken 69 kelide el namysyn qorǵap júrgen Abylaihan búgin alǵashqy aiqasynda mońǵoliialyq Mishil Battómórge qarsy ótkizdi. Asa tartysty ótip jatqan jekpe-jektiń úshinshi raýndynda qarsylasynyń qabaǵy jarylyp ketti. Ókinishke qarai, aýyr jaraqat alǵan monǵoliialyq boksshyǵa ringidegi tóreshi ary qarai jekpe-jeti jalǵastyrýǵa jol bermedi. Nátijesinde, alǵashqy raýndtarda basymdyq tanytyp kele jatqan Júsipovti tóreshiler bir aýyzdan jeńimpaz dep tapty.
Osylaisha Ǵalymbek Kenjebaev baptaityn ulttyq qurama boksshylary ázirge jeńilissiz kele jatyr.
Osyǵan deiin habarlaǵanymyzdai, erler arasynan sharshy alańǵa birinshi bolyp shyqqan 63 keli salmaqta Zákir Safiýllin, ekinshi ret sharshy alańǵa kóterilgen 81 keli salmaqtaǵy Bekzat Nurdáýletov jáne qazaqstandyqtar sapynan erler arasynda úshinshi bolyp aiqasyn ótkizgen 75 keli salmaqtaǵy Ábilhan Amanqul da alǵashqy aiqasyn jeńispen bastaǵany týraly jazǵan bolatynbyz.
Jalpy, atalǵan Amman qalasynda ótip jatqan olimpiadalyq irikteý týrnirine bas bapker Kenjebaev 8 boksshyǵa úmit artyp alyp kelgen bolatyn.
Olar 52 keli salmaqta Sáken Bibosynov, 57 kelide Serik Temirjanov, 63 keli salmaqta Zákir Safiýllin, 69 kelide Abylaihan Júsipov, 75 keli salmaqta Ábilhan Amanqul, 81 kelide Bekzad Nurdáýletov, 91 keli salmaqta Vasilii Levit jáne asa aýyr salmaqta (+91) Qamshybek Qońqabaev bar.
