Mádeniet jáne sport vitse-ministri Eldos Ramazanov bastaǵan qazaqstandyq delegatsiia Katovitsede WADA uiymynyń bas direktory Oliver Niggle jáne WADA-nyń Aziia óńirindegi keńsesiniń basshysy Kazýhiro Haiashimen kezdesti, dep habarlaidy "Ult aqparat".
Dene shynyqtyrý jáne sport komitetinen málim etkendei, kezdesý sporttaǵy doping máselelerine arnalǵan V Búkilálemdik Dopingke qarsy konferentsiia aiasynda ótti. Qazaqstandyq tarap dopingke qarsy erejelerdi buzǵany úshin jaýapkershilikti qatańdatý, Ulttyq dopingke qarsy uiymnyń mártebesin arttyrý suraqtaryn qamtityn zań jobasy týraly keńinen aityp berdi. Óz kezeginde Niggle myrza Qazaqstan Úkimetiniń atalǵan baǵytta qolǵa alyp jatqan reformalaryn joǵary baǵalap, bolashaqta dopingpen kúres máselesinde yntymaqtastyqtyń nyǵaiatynyna senim bildirgen.
Aita ketsek, dene shynyqtyrý jáne sportqa qatysty zań jobasy Májilistiń ekinshi oqylymynda maquldanyp, SQR Parlamenti Senatynyń qaraýyna jiberilgen bolatyn.
Óz kezeginde, Kazýhiro Haiashi doping-synamalardyń saqtalýy júiesiniń reformalanyp jatqanyn aita ketti.
«Olimpiada oiyndaryna deiin alynǵan doping-synama bolashaqta 10 jyl saqtalady. Bul doping-synamalardy saqtaý men olardy qaitadan saraptamadan ótkizýdiń jahandyq baǵdarlamasy bolmaq», - deidi Haiashi.
Sonymen qatar, qos tarap dopingke qarsy kodeks pen halyqaralyq dopingke qarsy standarttardyń qaita qaralý protsesin talqylady. Jańa halyqaralyq standartqa súiensek, qandai da bir eldiń dopingke qarsy agenttigi halyqaralyq kodekske sai kelmeitin bolsa, sol eldiń sportshysy jarystan shettetiledi. Onyń qatarynda Olimpiada oiyndary da bar.
Eske sala keteiik, 2017 jyldyń jeltoqsanynda WADA uiymy dopingke qarsy kodeks pen halyqaralyq dopingke qarsy standarttardy qaita qaraý protsesin bastaǵan bolatyn. Sodan beri 2000 túzetýler óńdelip, ózgeriske ushyraǵan qujatty álemdik zańgerler saraptaýdan ótkizgen. 2017 jyldan beri qaralyp kele jatqan ózgerister Polshadaǵa konferentsiianyń da basty taqyryptarynyń biri bolmaq.
5 qarashada Polshanyń Katovitse qalasynda sporttaǵy doping máselelerine arnalǵan V Búkilálemdik Dopingke qarsy konferentsiia bastaldy. Atalǵan jiynǵa búkil álemnen 1000-nan astam delegat qatysyp jatyr. Kún tártibinde – dopingpen kúres máselesi. Sondai-aq, konferentsiia barysynda Polshanyń sport jáne týrizm ministri Vitold Banka Búkilálemdik Dopingke qarsy Agenttik uiymynyń (WADA) basshysyna taǵaiyndalady.
