Búgin Jetisý oblysynyń ákimi Beibit Isabaev Parij Olimpiadasynyń kúmis júldegeri, palýan Demeý Jadyraevty qabyldap, "Jetisý oblysynyń Qurmetti azamaty" tósbelgisin taqty. Anasy Kúlipa Bijanovaǵa saltanatty túrde qurmet kórsetip, Jarkent qalasynan jańa úidiń kiltin tabystady, dep habarlaidy "Ult aqparat" Stan.kz aqparat agenttigine silteme jasap.
Sondai-aq sportshynyń alǵashqy bapkeri Jumahan Turǵambekovke jáne jeke bapkeri Boranbek Qońyratovqa qarjylai syilyqtar tapsyryldy.
Óz kezeginde Demeý Jadyraev aldymen anasyna erekshe qurmet kórsetkeni úshin alǵys bildirdi.
"Anamdy arnaiy shaqyryp, qurmettep, baspana syilap jatqandaryńyzǵa kóp rahmet aitamyn. Kezinde Taldyqorǵanda Jaqsylyq Úshkempirov atyndaǵy daryndy balalarǵa arnalǵan sport-internat mektebinde tórt jyl oqyp, sol jerde qanatymyz qataidy, úlken sportqa qadam basýǵa kópir boldy. Týyp-ósken jerimiz "Jetisý oblysynyń Qurmetti azamaty" ataný men úshin úlken mártebe", - dedi Demeý Jadyraev.
Eske salsaq, grek-rim kúresinen Qazaqstannyń eńbek sińirgen sport sheberi Demeý Jadyraev – Jetisý oblysy Panfilov aýdany Úsharal aýylynyń týmasy. Onyń sporttaǵy alǵashqy qadamy Úsharal aýylyndaǵy mektepte kúres sektsiiasyna qatysýdan bastalǵan. Bul sektsiiada oǵan kúrestiń bastapqy álippesin úiretken jattyqtyrýshy Jumahan Turǵambekov boldy.
Keiin 2003-2007 jyldarda Demeý Jadyraev Taldyqorǵan qalasyndaǵy daryndy balalarǵa arnalǵan sport-internat mektebinde oqydy. Bul mektepten Mirat Sársenbaev, Karina Goricheva, Igor Son, Ilfat Abdýllin siiaqty álem chempiondary men Olimpiada júldegerleri shyqqan. Osylaisha Jetisý jerinen bastalǵan sporttaǵy jol úlken dańǵylǵa ulasyp, Demeý Jadyraev biyl Parijde ótip jatqan HHHIII jazǵy Olimpiada oiyndarynda kúmis medalǵa ie boldy.
