Almatyda sot Olimp KZ býkmekerlik keńsesiniń isi boiynsha aiyptalýshylarǵa úkim shyǵardy, - dep habarlaidy "Ult aqparat".
Almaly aýdandyq sotynda OLIMP KZ qyzmetkerlerine qatysty qylmystyq isti qaraý aiaqtaldy. Is boiynsha 20-dan asa aiyptalýshy bar, olardyń 11-i sottalýshy, al toǵyzy áli izdeýde. Olar uiymdasqan qylmystyq topqa qatysqany, zańsyz oiyn biznesin uiymdastyrǵany, salyq tóleýden jaltarǵany, qylmystyq jolmen alynǵan aqshany zańdastyrǵany (jylystatqany) úshin sotqa tartylǵan.
"Sot qylmystyq is boiynsha aiyptalýshylar turaqty uiymdasqan top quryp, onyń qyzmetin basqarǵanyn anyqtady. Toptyń negizgi qylmystyq áreketi - býkmekerlik qyzmet túrindegi zańsyz oiyn biznesin uiymdastyrý jolymen qylmystyq tabys alý, biýdjetke salyq tóleýden jaltarý jáne qylmystyq jolmen alynǵan aqsha qarajaty men ózge de múlikti odan ári zańdastyrý", - delingen sottyń baspasóz qyzmeti habarlamasynda.
2014 jylǵy qańtardan beri sottalýshylar jasaǵan is-áreket:
- kompaniia serveriniń ornyn Qazaqstannan tys jerlerge ózgertý, "Olimp" býkmekerlik keńsesiniń saityna elektron kazino oiynyn kirgizý;
- túsken aqshalai qarajatty qolma-qol aqshaǵa ainaldyrý;
- shetel valiýtasyna aiyrbastaý jáne Qazaqstannan tys jerge áketý úshin kýrerlerge berý, sondai-aq olardy zańdastyrý.
Olardyń qylmystyq áreketi nátijesinde memleketke 95 milliard teńgeden asa zalal kelgen. Sottalýshylar qylmystyq toptyń bar ekeni týraly bilmegenderin aityp, kinásin moiyndamady. Qorǵaýshy tarap sottan sottalýshylardy aqtaýdy surady.
"Sot sottalýshylardyń kinási is materialdarymen, sonyń ishinde jasyryn tergeý áreketterimen dáleldendi degen qorytyndyǵa keldi. Sotta prokýror aiyptaýdy qoldady jáne barlyǵyna naqty bas bostandyǵynan aiyrý jazasyn taǵaiyndaýdy surady. Sot sottalýshylarǵa jaza taǵaiyndaý kezinde jeńildetetin jáne aýyrlatatyn jaǵdailardyń bolmaýyn eskerdi", - dep tolyqtyrdy sotta.
Sot úkimimen sottalýshylar qylmystyq topqa qatysý dárejesine qarai 5 jyldan 8,5 jylǵa deiin bas bostandyǵynan aiyrý túrindegi jazaǵa kesildi. Olar ortasha qaýipsizdik mekemesinde jazasyn óteidi.
"Sottalýshylardyń qylmystyq jolmen alynǵan múlki memleket kirisine tárkilendi. Sottalǵandardan memleket kirisine materialdyq shyǵyn - 95 milliard teńge óndirildi. Sot úkimi zańdy kúshine engen joq", - dedi Almaly aýdandyq sotyndaǵylar.
Aita keteiik, 2019 jyldyń jeltoqsanynda UQK OLIMP KZ býkmekerlik keńsesiniń qyzmetin tekserýdi bastaǵan bolatyn. Tergeý málimeti boiynsha, kompaniia zańnama normalaryn buzǵan jáne internet-resýrstar arqyly belgili bir kiris alý arqyly litsenziialanbaǵan qyzmetti júzege asyrǵan. Al bul salaǵa salyq salynbady.
